Taoba Nagaland CM Zeliang-i NIA den ajurutep

Guwahati, Metsüremi (March) 31 (Agencies): Küptoknü (Honibar) taoba Nagaland chief minister TR Zeliang-i NIA indang New Delhi headquarters nung ketdangsertem den ajurutepogo.
Pai chief minister inyakba kümsük nung NSCN(K) aser tanga Naga telungpur teloktem nem sorkar sen agütsüba ken o nung pa dang asüngdangya asütsü atema NIA-i jaok.
Tanü TR Zeliang-i NIA dang pa tain akümba atema New Delhi mesüra Kohima nung par kidang dang pa dang asüngdangya asütsü atema temepishiba ka agütsü.
“Zeliang-i pa arishi küm 65 ajangogo aser senior citizen ka asüba yong NIA office nung masü saka par kidang dang asüngdangya südaktsünür ta temepishiba ka agütsü. Ozü legal cell-i pai agütsübaji shidiji reprangdangtsü aser pa metentsüsa kuli ngura, agizüktsü” ta NIA osang ka ajanga ashi.
NIA-i bushisüngdanga aruba nung TR Zeliang dang asüngdangya asütsüsa akümer, ta parnokisa shisem.
Ano külen NSCN(K)-i NIA dang kechiba NSCN(IM)-i tax saruba inyakyim atemabo bushisüngdang masür ta asüngdangogo.
2012 aser 2016 tsüngda NSCN(K), NSCN(R), FGN aser NNC teloktem nem sorkar sen agütsüba aser tax saruba indang maparen NIA-i bushisüngdanga arur.
“Koba mapang India sorkari NSCN-IM nem Nagaland state nung tax sarutsü aser tashiyim agi sen sarutsü temelaba agütsü? Nagaland nung Naga nunger dang sen saruba, tashiyim agi sen meshiba, commission agiba, senchi achiba amala nung NSCN-IM-i Azha (order) tesashi amshir aser tatok magütsür” ta NSCN(K) otongdar Isak Sumi-i social media nung metetdaktsü.
Yaküm (Rongchii) ita NSCN-IM-i Naga nunger khuret angateta “employee tax” 24% agiba nungi 12% dang agitsü ajemtsür aser nübortemi iba tetuyuba sülen anidaktsü mepishir ta sangdong ka nung metetdakja liasü.
“NSCN-IM-i Nagaland nung Naga nunger dang tax teimba meshiba ajanga nübortem timtemdaktsür” ta Isak Sumi-isa ashi.
National Investigation Agency (NIA)-i tai tonglokja aliba nisungtem rongnung Isak Sumi ya ka lir.