Taoba NNC lenir Imnanonen alima nungi pilaogo

Dimapur, April 04 (TYO) : Mongolbar, April 04 nü Naga nunger yimten lenir tebu tedi Wb. Imnaonen Jamir Dimapur nung lia alima nungi pilaogo. Pa arishi küm 94 liasü.
Asür Wb.Imnaonen ya Akhoya nunger aser pa 1950 küm nungi 1956 küm tashi Naga yimten nüchiso bushir Naga National Council (NNC) nung tongti zülur liasü. Pa NNC nung inyakba mapang India sepaitemi pur tepuokdak 1956 nungi 1957 küm tashi puoka ayu. Iba sülen Nagaland state kümtetter külena Ao Tribal Council nung 1962 küm nungi 1965 tashi mendenbuba liasü. Pa leniba nung Konyak Tribal Council aser Phom Tribal Council tenzüktsü. Pa linük tenzükba mapa nung alidang NNC tir A.Z.Phizo den külemi yaritepa inyaker tongti nisung ka liasü. Naga nunger anülu aser anüdok alir ajak ka küma longjemer Naga yimten nüchiso bushitsü longjemdaktsüba mapa nung pa tongti shilem agir ka liasü.
Pa ya Fazl Ali College, Clark Theological College aser Tuli College tenzükertem rongnung dena liasü. Pa yimten mapa nungi anener külena Tsüngrem mapa nunga meranga inyakba nisung ka liasü.
Pa den asüpila sentep sentong Bodbar, April 05, 2017 anepdang 9:00 ako nung Dimapur Ao Baptist Arogo tenla ki tuluba (Duncan) sülen DABA Multi-purpose Hall nung alitsü renema lir.