Taoba PM, AB Vajpayee süogo; linüki 7 nü mangyimtsü

New Delhi, Luroi/August 16 (Agencies): India nung taoba mapang Ato kilonser, Atal Bihari Vajpayee arishi küm 93 lia Luroi/August 16 nikongdang 5:00 ako tera süir alima nungi pilaogo.
Rasemnü/Bodhbar aonung nungi tenzüka AIIMS Hospital, Delhi nung Vajpayee nem life-support agüja liasü saka tesüiba ghonda 24 tsüngda pa temang tamajungba akum.
Vajpayee dak urinary tract infection den natzü junga maoba aser teko nung timtem adoka Aami/June 11 nü All India Institute of Medical Sciences (AIIMS)-i anir oa liasü.
Vajpayee ya sangrema liasü, aser pai par jala, (‘adopt’ asüba), Namita Kaul Bhattacharya toktsür alima nungi pilaogo.
Vajpayee ya diabetes agi shiranga liasü aser pa dak tezüngjang kati dang mapa inyaka liasü.
Vajpayee ya 1924 küm Luchii/December 25 nü Madhya Pradesh kübok Gwalior nung aso, aser pa nüngtem nung pa asoba anogomong ya ‘Good Governance Day’ amonger.
Union Home Minister, Rajnath Singh-i, Vajpayee nem nüburtemi akhüm agutsütsü atema tasümangji par kidangi bener aotsü, ta metetdaktsü.
AB Vajpayee mezüng 1962 küm Rajya Sabha nung shima Parliament züngsem akum. Iba sülen küm 9 lir ang pai election nung takok angu. Pai Lok Sabha election nunga tenetben tashi takok ngua liasü.
1996 küm pai anogo 13 nü Ato kilonser ama yimsüsüa liasü, 1998 küm nungi ita 13 aser 1999 küm nungi küm trok jungnüa Ato kilonser inyak.
Pa Parliament nung küm 47 tashi alidang pa dak asayamenü aser o tsüngro songa jembiba sempet ajanga linük nüburtem puadaktsü.
Vajpayee asüba osang sangdongba sülen linük Tir, Ram Nath Kovind aser Ato kilonser, Narendra Modi nati anir aikati mangyim osang lemsatepogo.
Linük Tir, Kovind-i, Vajpayee ya atangji India nunger yimtenren lenir ka liasü, ta ashi. “Pa dak lenisüba sempet, tarutsü nükla aliba, teintet shisatsü aser o jembitsü nung tsüngro tasong ajanga pa alakteta shisang. Ajaki pa menungratsü,” ta Tirisa ashi.
Ato kilonser, Modi-i, “Iba ya kü nija atema takoksa. India-i temeim Atal atema mangyimer. Pa pilaba ajanga putu mapang ka tembanger. Pai linük asoshi ali, aser küm aika junga tenzük. Iba ama mangyim mapang nung ni par kibong, BJP Karyakartas aser pa nükshir million aika den mangyim lemsateper,” ta ashi.
Congress Party Tir, Rahul Gandhi-i, “Tanü India atema jabaso ka makai kümogo. Taoba Ato kilonser, Atal Bihari Vajpayee ya million aikati meima akhümtsübua liasü. Ni par kibong aser pa nükshir ajak den mangyim lemsateper. Asenok ajaki pa menungratsü,” ta lemsatep.
United States-ia, India-America tesendaktep tashi itdaktsüba atema Vajpayee bilemtettsü, ta ashi.
US Embassy in India-i sangdong ka ajanga, “Taoba Ato kilonser Atal Bihari Vajpayee asüba atema US-i India den külemi mangyimer. India nung US Mission-i par kibong aser India nunger sensotem den mangyim lemsateper,” ta metetdaktsü.
Asür nem akhüm agüja asüng state aika nung kaket rejutem aser sorkar office tem shibangtsü, aser anogo tenetnü tashi linüki mangyimtsü sorkari sangdongogo.