Taoba PM Manmohan-i GDP shilem 2 ajemtsü ta ashiba ama atalokogo

New Delhi, September 01 (Agencies): Taoba mapang Congress-i aniba UPA sorkar nung Ato kilonser inyaksang, Manmohan Singh-i tamalen ‘demonetisation ajanga GDP shilem ana ajema akumtsü’ ta jembiba ama shidak atalokogo.
Yashi sorkari data sangdongba ajanga ashiba agi, India nunger Gross Domestic Product (GDP) financial year 2017-18, April-June shilem 5.7 dang kümogo aser ibaji shilem 2 ajema aluba lir.
Yaküm November 8 nü Ato kilonser, Narendra Modi-i demonetization sangdongba sülen hopta ana lir November 24 nü Rajya Sabha nung jembidang taoba Ato kilonser, Manmohan Singh-i, iba telemtetba ajanga linük GDP shilem 2 ajemtsü, ta jembia liasü.
Singh-isa Modi dang, “Nüburtemi bank nung sen deposit süaka sen magizükdaktsüba linük kar danga Ato kilonseri shitettsü asü?” ta asüngdanga liasü.
Demonetization onük nung o toktepdang taoba mapang Finance Minister aser Reserve Bank of India (RBI) Governor inyaksang, Manmohan-i, “Tang inyakba mapa ya ajanga linük income, linük GDP shilem 2 ajema akumtsüa akok. Iba ya tali asadangba masü saka ajema asadangtetba lir,” ta jembia liasü. Iba mapang nung Ato kilonser, Modi aser Finance Minister, Arun Jaitley natia kanga nendaka angaa liasü, aser tang pai jembiba ama shidak atalokogo.
“Anogoshia bank inyakyim tasentem benokbaji majung. Iba ya ajanga alima dang Prime Minister’s Office, Finance Minister’s Office aser Reserve Bank of India noksa mejungi sayur,” ta Economist, Manmohan-isa jembi.
Manmohan-i jembiba ama atalokba sülen tang iba nungji ajemdaker opposition teloki Ato kilonser-i aniba Centre sorkar aitsüdar.