Taoba RJD MP, Md Shahabuddin takum piyong tepouktak ayutsü

Siwan (Bihar), December 11 (Agencies): Küm 11 tejaklen Bihar, Siwan district nung adianu ana dak ‘acid’ shiloktsür tepsetba ken o nung tanü district court kati taoba mapang RJD MP, Mohammad Shahabuddin den tangar nisung asem akumli piyong tepouktak ayutsü obendang agütsüogo.

Additional District Judge, Ajay Kumar Srivastava-i 2004 küm atalokba ken o nung Shahabuddin aser pa den yariteper asem- Rajkumar Sah, Sheikh Aslam aser Arif Hussain nunger akumli piyong tepouktak ayutsü obendang agütsü.

Bodhbarnüa kasa court-i par pezüpronglaji IPC sections 302 (nisung tepsetba), 364A (sen akhangtsü atema nisung apuba), 201 (kuli samatsüba mesüra osang tai agütsüba) aser 120B (ozüng alema sentong tamajung yangluba) tem nung aija liasü.

Iba ken o nung court-isa Mohammad Shahbuddin dang senchi 20,000 chiogo.

Prosecution ajanga ashiba agi, August 16, 2004 nü Rajkumar Sah, Sheikh Aslam aser Arif Hussain nungeri nisung ka tenüng agi Chandrashekhar Prasad’er jabaso asem apuba sülen Pratappur yimtsüngi anir oa Girish aser Satish na dak acid shilokja tepset. Ajisüaka adianu rongnung ka, Rajeev Raushan bo jenbuteta liasü.

Iba tatalokba sülen asür ana tetsü, Kalawati Devi-i Shahabuddin den nisung asemji anema FIR ka benoka liasü. Iba ken o nung Rajeev-i obendanger nem tenük kuli agütsü, ajisüaka yaküm June 16 nü mejangjaba nisung kari pa-a tepsetogo.

Ken o aika dak sentakba nung Shahabuddin ya Siwan Central jail nung tesüiba küm aika puoka lir.

Pai Lalu Prasad’er party RJD nungi 1996 küm nungi 2009 tashi nung Siwan nungi pezüben toktepogo, ajisüaka pa nem tai tongloktsüba sülenbo pai Parliamentary election nung shilem magitet. Pa kinüngtsü Heena Sahab-ia RJD ticket nung 2009 küm aser 2014 küm toktepa liasü.

1989 küm Shabuddin-i Jiradei menden nungi takok ngua yimtenren nung ajemok.