Taoba Russia Parliament Speaker süogo

Moscow, July 20 (Agencies): Russia Parliament nung tesüiba mapang speaker inyaksang, Communist telok nungi yimsüser, Gennady Seleznyov, talangka manemi aliba sülen arishi küm 67 nung süogo, ta Hombar nü par kinüngertemi metetdaktsü.

“Gennady Nikolaevich ya par kidang aonung mapang ka nung asü,” ta tanük-i ashiba Interfax news agency ajanga metetdaktsü.

Pa kanga tashii shiranga liasü aser anogo ishika tsüngda pa temang kanga mejungi kümadokba ajanga doctor temia kechiang mesütsüi aküm.

Seleznyov ya Urals jila, Serov nung 1947 küm aso aser 1993 küm election nung takok anguba sülen 1996 nungi 2003 tashi Duma state nung Speaker inyaka liasü.

Pa ya journalist training agir aliba ajanga politics tsütsüa kanga aika ajangshia aliba nisung ka liasü.

Seleznyov-i tensai aginüba ama Parliament nung terenlok jenti agütsüogo, ta tang Duma state nung Speaker teinyakdak Sergei Naryshkin-i sangdong ka ajanga ashi.

2000 küm Tir Vladimir Putin kübok Communist Party tashi ajema akümba mapang Seleznyov-a politics maparen nungi atsüngzüka aküm.

Pai party tetuyuba nung manidakba aser Speaker menden magizükba ajanga 2002 küm Communist party nungi anendakja liasü.

Iba sülen pai ‘Russia`s Revival’ ta ser party ka tenzük.

Pa Duma nung speaker meinyakdang Communist osangkaket, Pravda dena tanga osangkaket aika nung ‘editor-in-chief’ mapa inyaka liasü.