Taoba sorkari inyakba atema NDPP-i tenüng tajung agir: NPF

Kohima, Mongputeni/Oct. 04 (TYO): State nung gari lenmang tajungba akumtsüji taoba NPF sorkar atema tongti onük ka liasü, aser iba atemaji Central sorkari sen crore aika agizük, aser ibaji taoba NPF sorkari inyaktetba liasü, ta tanü Press Bureau, Naga People’s Front, Central Headquarter, Kohima, Nagaland-i sangdong ka nung metetdaktsü.
“Ajisüaka PDA Chief Minister, Neiphiu Rio-i par sorkari Kohima-Dimapur lenmang nungi tenzüka küm ka tsüngda lenmang ajak junga yanglutsü, ta sangdongba atema süngmanger, kechiyong ibaji taoba sorkar mapang agizük, aser work orders aika agutsüogo. Tatishitsü agi, Golaghat-Purana Bazaar (2 lane), Purana Bazaar-Chumukedima (4 lane) atema work order ji yaküm Luroi/August 2017 ita nung agutsü aser New Check gate-Lerie (2 lane) work order ji yaküm Rongjui/Sept. ita nung agutsü,” ta sangdong nung shia lir.
Anungji NPF-i CM dang ya asüngdangner, par PDA sorkari koba lenmang yangluner, kechiyong tang teinyakdak mapa ajakji TR Zeliang-i aniba taoba NPF sorkari tenzük aser mapaji junga inyaka liasü saka mongpu nung ajemdaker teinyakdak mapa anena liasü, ta sangdong nung shia lir. NPF-isa, CM-i nüburtem nem sangdong agutsübaji tashioktsüba ka dang lir, kechiyong par sorkari inyaktet ta pai sangdongba project temji taoba NPF sorkar mapang tenzükba lir, ta metetdaktsü.
NPF-isa PDA nungi Planning Minister, Neiba Kronu dang, Central sorkari gari lenmang project atema sen agutsütsü atema mapang agitsü, anungji state sorkari pei resources nungi inyaktsü ta jembibaji kechi nung ajemdaker jembir, ta asüngdanger.
NPF-i Minister dang, pai state senpong nungi sen kwi lemzüktsütsü aser state sorkari gari lenmang yanglutsü atema senji koma alemtsü, ta asüngdang.
“Taoba sokrari inyakba mapatem atema tenüng tajung agitsü melenbo tan aliba sorkari taoba sorkari tenzükba gari lenmang projects ji mapang shidak nung junga tembanga inyaktsüla,” ta NPF-isa metetdaktsü.
NPF-i ya lepshia ashir, taoba budget senden 2018 nung PDA sorkari district headquarters sendaktepba lenmang ajakji anogo 30, 60, 100 tsüngda yanglutsü ta nangzük, iba sülen ita tenet süiogo, ajisüaka ibaji mapa küma inyakba mangur, aser Naga nungeri ibaji meteta lir, ta ashi.
“CM-i nüburtem dang küm ka tsüngda par sorkari state nung lenmang ajak tembanga yanglutsü ta sangdongogo, aser ibaji nungita Planning Minister, Neiba Kronu-ia benjung mongpu matongdang gari lenmang ajak yanglutsü ta shiogo. Planning minister ka ama Neiba Kronu-i state nung gari lenmang yanglutsü atema state senpong nungi sen kwi lemzüktsürar sangdongtsüla, kechiyong taoba budget senden nung district Hqs. ajak nung gari lenmang yanglutsü atema sen crore 60 lemzükja liasü, saka PDA sorkari department nem sen crore 25 dang agutsü, aser ibaji tawa tembangba senden nung Minister I/C PWD-i metetdakja lir,” ta NPF-isa metetdaktsü.
Ajioda süaka Chief Minister, Rio-i nüburtem dang küm ka mapang asüngdangbaji mapang talangka asutsü, kechiyong PDA sorkar anogotem züngdangteta lir, ta Naga People’s Front-isa metetdaktsü.