Taoba sorkari inyakba project tembanga inyaktsüla: NPF

Kohima, Metsüremi (March) 29 (TYO): PDA sorkari parnoki Centre nungi senotsü bener arua state nung terenlok mapa inyaktsü, ta sangdongbaji tiyazü aser tajemdakdak maka; Metsüremi 14, 2018 nü sorkar telemtetba reprangdangra taoba sorkari state tesem balala nung gari lenmang yanglushitsü atema sen lemzükja alibaji Chief Minister-i pa melungka nung par tesem aser par nisungtem ajangzükdaktsütsü atema meyipshishiba lir, ta tanü Press Bureau, Naga People’s Front, Central Headquarters, Kohima: Nagaland sangdong ajanga metetdaktsü.
Taoba sorkari Special Road Development Programme kübok state nung gari lenmang project 17 renloktsü aser yanglushitsü atema sen crore 150 lemzüktsü, aser item rongnung Naginimora-Tiru road, Zunheboto Town road, Longtoker village nungi Tuensang, Shamatore town road, Darogapathar (Dimapur) nung kilentzü aodak aser gari lenmang, Thonoknyu nungi Waphur road (Noklak), Heningkunglwa nungi Kupunala road, Niuland Bridge/culvert yanglushitsü aser Peren-Tening-Nsong road densema lir; item mapa timbaka tembangogo aser kar tatemer dang lir, ta kasa sangdong nung shia lir.
Ajisüaka public aser contractors mezüngmeshia PDA sorkari Metsüremi (March) 14, 2018 nü item projects revise süshia liasü aser senotsü agizüktsü atema administrative temelaba agia Sovima nung Circular Road, Seluophe nung gari lenmang aser kilentzü yanglushitsü, Razhaphe nung gari lenmang yanglushia anepalutsü, Phesama nung circular road aser Botsa nung EAC HQ road ama tanga mapa tanaben lemzükshitsü, ta sangdong nung shia lir.
“Naga People’s Front-i state nung terenlok mapatem anema mali aser PDA sorkari Chief Minister Neiphiu Rio-i melungba tesemtem nung terenlok mapa inyaktsüji pelaa agizüker. Ajisüaka tejashitsü kaji, Centre nungi senotsü tali bener arusemtsü melen project tembanga inyaker aliba mesüra mapa tembangtsüsa aliba project atema lemzüktsüba senotsü tan aliba sorkari tangai meyipa amshibaji taaaktsü mapa,” ta sangdong nung shia lir.
“Talisa department-i sen lemzüktsür agizüka aliba aser district balala nung project balala atema Planning aser Finance departments-i agizüker aliba senotsü tangaleni meyipa district ka-ana nung projects atema amshibaji khenyongi tim masü, tejashitsüka aser magizüktettsüsa lir,” ta parnoki metetdaktsü.
“Taoba sorkari terenlok mapa achaayanga inyakba tesemtem nung aliba nüburtemji terenlok atema metemsü ta PDA sorkari züngshir asü?,” ta parnoki asüngdang.
PDA sorkari contractors nem item projects tembanga inyakdaktsütsüla, aser taoba DAN sorkari achaayanga inyakba atema memonoi senotsü ajak agutsütsüla, ta sangdong nungsa shia lir.