Taoba Speaker & MLA Kiyanilie Peseyie süogo ; Jotsoma nung tanü 1:00 ako nung asüpila sentong agitsü

Dimapur, September 27 (TYO): Taoba Nagaland Assembly nung Speaker aser MLA Kiyanilie Peseyie tanep yakta Dimapur nung mozüki ka nung asü.
Arishi küm 69 tain Kiyanilie-i pa kinungtsü den jabaso ana aser jala tenet yutsür akümli toktsür ogo.
Brihostibar nikongdang 1:00 ako nung asür Kiyanilie’er yimtsüng Jotsoma nung pa den state funeral service agitsü ta Nagaland Chief Secretary-i sangdong ka nung metetdaktsü.
Asür Kiyanilie ya Western Angami menden nungi MLA teinyakdak liasü.
Nagaland aser Arunachal Pradesh Angh, PB Acharya-i tanü asür Kiyanilie Peseyie ajungbena asüba osang angashia temulung raksar ta sangdong ka nung metetdaktsü.
Asür Kiyanilie kinungtsü Vilekhono Peseyie dangi züluba shidi ka nung Acharya-i “asür Kiyanilie-i Nagaland Legislative Assembly nung züngsem ka ama Nagaland nung aliba nübortem atema mapa inyaka aru. Pai Social Welfare Department & Parliamentary Affairs Minister aser State Excise Department ketdangser inyak. Nagaland nung alirtemi asoshi lennir tajung ka samaogo” ta metetdaktsü.
Odisha Angh, SC Jamir-ia sangdong ka nung asür Kiyanilie asüba atema temulung raksaba metetdaktsü.
“Asür Kiyanilie ji lennir tajung ka liasü aser pa tasünü tashi chichiba regionalist ka ama liogo. Pa ya bendanga agütsüba yimsüsür ka liasü aser pa indang alizüngji nübortem tenzüktsü atema liasü. Pa asübaji Naga loktiliba atema takoksa ulura lir. Ni aser kinungtsü nati tasür kibong den asükhu lemsateper aser asür tanela anisüngzük ngudakjang ta sarasademtsür” ta SC Jamir-isa sangdong nung ashi.
Nagaland Lok Sabha MP, Neiphiu Rio-ia asür kinungtsü Vilekhono Peseyie aser kibong den asükhu lemsatepba metetdaktsüogo.
Pa taküm piyong lokti tenzükba wadang nung bendanga agüja inyak. Pa lanur asüdang nungi sorkar mapa inyaktsü tenzük aser pa tajungtiba agi sorkar tenzük. Pa ya bendanga agütsüba aser nendaka inyakba ketdangser ka liasü aser mapa takok ngua inyakba sülen anisüngzük. Iba sülen pai yimten mapa nung tetsüng ajemoka inyaktsü tenzük aser pa tango sademba anogo tashi pai lennir tajung ka ama mapa inyaka aruogo, ta Rio-isa shisem.
Naga People’s Front (NPF) President, Dr Shurhozelie Liezietsu-ia sangdong ka nung asür Kiyanilie asüba atema aoksaba metetdaktsü.
Pa mapang tatsüka temang manemi aruba osangbo angashir liasü saka pa asütsüsa shiranger ta asübajibo kecha mangazüki liasü, ta Dr Shurhozelie-i sangdong nung ashi.
Asür Kiyanilie ya kanga dang tenendak aser bendanga agütsüba party züngsem ka liasü. Tangari meinyakba mapa pai tasü itta inyak aser Nagaland Legislative Assembly nung kümsük ana (2003 -2013) tashi Speaker inyakdang, pai Speaker indang office temaba jenjang nung ajungket, ta paisa shisem.
Iba mangyimba mapang, ozü kibong aser Naga People’s Front tenüng nung ni tasür kibong den asükhu lemsateper aser Tsüngremi nenok nem tesünep agüjang ta sarasademtsür, ta Dr Shurhozelie-i ashi.
Maneni, NPCC Tir K Therie aser Nagaland Contractors’ & Suppliers’ Union (NCSU) Head office Kohima-i sangdong balala nung asür Kiyanilie Peseyie mangyimba aser par kibong den asükhu lemsatepba metetdaktsüogo.