Taoba Tir Abdul Kalam memorial atema mepishiba magizük

New Delhi, November 23 (Agencies): Taoba mapang linük Tir aser nüngtugu scientist, APJ Abdul Kalam’er kinünger Sayed Ibrahim-i Delhi nung Kalam aliba kiji asür nüngtem nung memorial, kaketnang ka yanglutsü mepishia liasü, ajisüaka NDA sorkari iba temepishibaji magizüki Union minister, Mahesh Sharma nem kiji lemzüktsü.
Iba temepishiba magizükba yong Sayed Ibrahim-i BJP nung primary züngsem densema party menden ajak toktsüogo.
2013 küm nungi Ibrahim ya Tamil Nadu nung BJP Minority Morcha tatong Tir inyaka arur, aser pai Kalam aliba kiji Kalam nüngtem nung National Knowledge Centre asütsü atema mepishia liasü.
Hombar nü sangdong ka ajanga Sayed Ibrahim-i, “July 27, 2015 nü kü ‘uncle’ aser taoba mapang India Tir Kalam Shillong, IIM kaketshirtem den tejembitak nung temulungjang nung timtem adoka asü. Iba sülen ozü kinüngertem aser India nüburtemi India sorkar dang Delhi nung Kalam aliba kiji National Knowledge Centre akümtsü mepishia liasü,” ta metetdaktsü.
“Nüburtem tenzüktsü atema ni shilem agia tenzüka aruba Centre nung yimsüsüba party-i Indian nüburtemi akhangba mataloktsü,” ta paisa ashi.
Dr Kalam taküm aliba mapang 10, Rajaji Marg, New Delhi nung nija kaketnang ka liasü. Iba kaketnang nungji pai teti kaketshirtem den shisa lemsatepa aruogo.