Taoba Tir Kalam indang kürakyanglu Odisha nung sayaogo

Balasore (Odisha), January 29 (Agencies): Taoba linük Tir, APJ Abdul Kalam indang Black Stone kürakyanglu Hokolbarnü Balasore nungi kilometer 15 pila oor Chandipur nung tzüyimküm anasa Integrated Test Range (ITR) nung sayaogo.
Taoba Tir indang feet 8 talang kürakyanglu sayatsüdang Odisha Chief Minister Naveen Patanaik-i, “Linük yangerba nung taküm bendanga agütsüsang Bharat Ratna angur APJ Abdul Kalam indang kürakyanglu sayatsüba atema ni nüma tangteter,” ta ashi.
Iba sentong nung jembidang state Tourism Minister, Ashok Chandra Panda-i, sorkari Balasore district kübok Chandipur, Dagara aser Talasari tzüyimkümtem nung tourist circuit yangluner, aser iba atemaji senotsü lemzüktsüogo, ta metetdaktsü.
Dr Kalam ya mapang talangka Balasore district nung inyaksema lir. Kalam leniba kübok Defence Research & Development Organisation (DRDO) nung unit ka, Integrated Test Range full-fledged test range akum.
2012 Jan. 7 nü Balasore nung golden jubilee benjungmung ka nung kaketshirtem den jembidang Kalam-i, pa mapang talangka nungi Balasore aser Chandipur nunga inyaksema aruba lemsatepa liasü.
Kalam-i, “Missile development programme atema DRDO nung inyakdang ni Chandipur (ITR) nung küm 10 jungnüa liogo. Chandipur ya tebor tajung tesem ka, iba tesem ya kanga süngjemer. ITR nung asenok nem awatsüng tajung ka moaja lir aser ozü noklang aikati iba awatsüng semdangba ajanga tali tebor jungdaktsür,” ta jembia liasü. Dr Kalam-i tesüsa November 28, 2006 küm ITR campus semdanga liasü.