Taoba Tir Kalam nem akhüm tulu agüja remtsüogo

Tanü Brehostibar nü Rameswaram, Tamil Nadu nung taoba India Tir, Dr. A.P.J. Abdul Kalam aremtsüba leper nung Prime Minister, Narendra Modi-i asür nem tesüsaba akümtsübu agüja  pa mang tsüngdang nokdakba noksa nung angur. (July 30, 2015.) 

New Delhi/Rameshwaram, July 30 (Agencies): ‘Nüburtem Tir’ ta ajasang Dr APJ Abdul Kalam tatembangbuba asüpila sentong nung tanü Ato kilonser Narendra Modi, Congress tatong Tir Rahul Gandhi, Karnataka Chief Minister Siddaramaiah aser linük balala nungi lenir aikati pa nem akhüm tetushi tulu agüja par jila Rameswaram (Tamil Nadu) nung remtsüogo.

Taoba linük Tir Kalam Hombar aonung IIM Shillong nung ajungbena asü aser tanü pa den tatembangbuba asüpila sentong nung nisung merirjang aika adenshia pa nem tetushi agüja “Bharat Mata Ki Jai” ta yimyim ayima liasü.

Kalam’er kibong tekülem ki, mosque nung sarasadem temeja ka agiba sülen pa tasümangji Rameswaram nung aliba Peikarumbu nung pa aremtsü mekazüka aliba ali acre 1.5 tiyongtsü nung remtsüogo.

Arishi küm 83 scientist Kalam nem gun salute densema sepaitemi tetushi tulu agütsüba sülen local Jamath aser par kinüngertem ongken nung remtsü. “Missile Man” ta ajasang Kalam tasümang nung Ato kilonser Modi-i naro tokja tatembang salem agütsüba sülen tekapu amteper tasümang longa jaja akhüm agüja liasü.

2002-07 tashi Tir inyaksang nem akhüm agütsüba temaitsü Tamil Nadu-i tanü sodi anogo sangdongba den külemi state meyong yi ayokba dokan ajak shibanga liasü, iba dak alia state tesem balala nung kaketshirtemi shimo milen tsükloka sarasadema pa nem tetushi agütsüogo. Linük nung mezüng asangur Tir inyaksang, Kalam-i Bharat Ratna densema award aika nguogo aser 1998 küm Vajpayee’er sorkar mapang Pokran nung India-i nuclear raraba tendangba nung pai shilem tulu agia liasü.

Kalam nem tatembangbuba akhüm agütsütsü asoshi yasüng nungi nübur jenti bus, train aser rong ajanga Rameswaram-i arua liasü aser karbo tanenzüktak mali gari lenmang tashi nunga mejangogo.

Kalam-i pa akümli mapang sensotem aser lanurtem dang, pei ajangzük aser linük-a renlokdaktsütsü asoshi mangdang ka ayutsüla ta jembiba ajanga nisung jenti ajungmesogo.