Taoba ULFA lenir Anup Chetia nem bail agütsüogo

Guwahati, December 17 (Agencies): Taoba mapang ULFA ‘general secretary’ Anup Chetia nem Brihostibar nü TADA ken o ana nung Guwahati nung aliba court kati bail agütsüogo saka pa anema ano ken o kar anüngdaka aliyongji pa maneni tepouktak alitsü.
Special judge Alokesh Bhattacharya-i Chetia dang bail bond sen lakh 5 aser security lakh 5 agütsür bail melaogo. Iba temepishibaji Chetia anema o akatsü aser tang yimjung ken o jembibaren nung pai shilem agitettsü atema lir.
Additional Public Prosecutor-i, Chetia nem bail agütsüba nung Assam sorkari tashishiba kecha mali, ta ashi.
Ajisüaka pa anema ano ken o kar anüngdaka lir asünungji pa tepouktak nungi madoktettsü.
Ano pa anema TADA ken o ka asüng angadangtsü aser yanü Indian Penal Court (IPC) ken o ka angadangtsü.
Tan ita tetenzüklen Chetia-i osangbenertem den jembidang pai ULFA aser Centre na tsüngda yimjung ken o jembiner ta shiogo.
November 11 nü pa Bangladesh nungi anir aruba sülen Assam, Golaghat nung nisung tepsetba ken o dak sentakba nung Delhi nung CBI-i pa pua liasü.
Ano Chief Minister Tarun Gogoi-ia, Chetia Bangladesh nungi anir arutsü atema state sorkari Centre den külem inyaka aruogo, aser tang pa India-i anir arur asünungji pa yimjung ken o jembiba nung dendaktsütsüla, ta shiogo.