Taoba UN Secretary General Kofi Annan süogo

Luroi/August 18, 2018 (Agencies): Taoba United Nations Secretary General aser Nobel Peace ngur alisang Kofi Annan arishi küm 80buba nung süogo. Pa indang Twitter account post ka nung ashiba agi, Kofi Annan mapang tatsüka shiranga lir süogo. “Kanga tang temulung zürepa Annan’er kinungrtem aser Kofi Annan Foundation-i taoba United Nations Secretary General Kofi Annan Luroi/Aug 18 nü mapang tatsüka shiranga lir asüba metetdaktsür,” ta foundation-i sangdong ka ajanga metetdaktsü.
Reuters sangdong ka ajanga ashiba agi, Kofi Annan Switzerland kübok Bern yimti nung mozüki ka nung Küptoknü anepdang yakta süogo.
Kofi Annan ya black African tem rongnungi United Nations Secretary General menden tongteter rongnung mezüngbuba liasü. Pai iba mapa 1997 nungi 2006 tashi term ana aben. Iba sülen pa Syria atema UN special envoy mapa inyak aser pa lenisüba kübok iba linük nung yimjung bener arutsü asoshi inyak.
United Nations nung tongti shilem agiba dak alia pai 2001 küm Nobel Peace Prize angu.
United Nations chief Antonio Guterres-i ashiba agi, Kofi Annan ya ‘mapa tajung inyaktsü asoshi nongshiba tashi ka liasü’.
“Lenla aika nung Kofi Annan ya United Nations liasü. Pai jenjang aika ajanga atur iba loktitentet putu tasen kati kecha dena medemdangtsü makokba akhüm aser temulungtetba nung len aniogo,” ta paisa ashi.
“Tanü asenoki tongtibang nisung ka, lenir ka: taoba @UN Secretary General @KofiAnnan mang ayimer. Pai iba alimar wadang kanga jung inyakogo aser iba ya tushitsü tetemsü,” ta United Nations migration body kati tweet asü.
Kofi Annan ya Ghana, Ashanti region yimtiba Kumasi nung aso. Annan ya European trading company; United Africa company nung executive ka chir liasü.
UN tekolakba ama term anabuba tembangba sülen Annan-i Kenya aser Syria nung yimjung asoshi maparen balala inyakba nung tongti shilem agia liasü.
Iba sülen pai yimjung asoshi inyaktsü atema foundation ka tenzük aser alima nung tebilemtsü balala indang mapang shia jembiba statesmen tain kar den longjem.
UN high commissioner for human rights Zeid Ra’ad Al Hussein-i ashiba agi, Annan asüba osang angashia pa kanga mang ayimer.
“Kofi ya humanity indang tatishitsü tajungtiba liasü. Pa nisung meyirejang aika tembar liasü aser million aika lenir liasü,” ta pai ashi.
Ato Kilonser Narendra Modi-ia Küptoknü taoba United Nations Secretary-General Kofi Annan asüba osang angazüka asükhu lemsatepogo. Pai Annan ya Africa nunger diplomat tongtibang ka dang masü saka international peace aser security wazüka ayur ka ta ashi.