Taoba UP CM, Akhilesh-i Lucknow nung Official Bungalow azüngtettsüogo

Lucknow (Uttar Pradesh), Aami/June 09 (Agencies): Samajwadi Party Tir aser Uttar Pardesh nung taoba Chief Minister, Akhilesh Yadav-i Lucknow nung pa nem lemzükja aliba official bungalow azüngtettsüogo, ta tanü ketdangsertem osang ka ajanga metetdaktsü.
Monupii (May) 7, 2018 nü Supreme Court-i, taoba mapang Uttar Pradesh chief minister temi office toktsüba sülen sorkar kiojen nung alitsü makok, ta oshidang agutsüba nung ajemdaker Akhilesh-i official bungalow azüngtettsüogo.
Supreme Court obendang nung ajemdaker Uttar Pradesh estate department-i taoba mapang state nung chief minister inyaker parnok trok- Narayan Dutt Tiwari, Mulayam Singh Yadav, Kalyan Singh, Mayawati, Rajnath Singh aser Akhilesh Yadav nunger dang official bungalow azüngtettsütsü atema metetdakja liasü.
“Yasüng Akhilesh Yadav-i pa nem lemzükja aliba sorkar bungalow indang azüngtetja estate department nem jabi agutsüogo,” ta department official Yogesh Kumar Shukla-i metetdaktsü.
“Joko taoba mapang chief minister, Narayan Dutt Tiwari-i dang bungalow azüngtetja jabi agutsütsü anünga lir,” ta paisa metetdaktsü.
ND Tiwari kinüngtsü, Ujjwala Tiwari-i, la kinüngbu joko akumli tembangtsü mapang ana nung lia tang Delhi nung lir, anungji la nem ano mapang tatsüka agüjang ta lai state estates department dang mepishia liasü.
“Tesüiba ita ti tashi pa shirang yipden nung lir, iba denji külemi ni-a temang manem. Ni Lucknow-i alua ki azüngtettsütsüji tamakoktsü,” ta shia lai estate department dang ki azüngtettsütsü atema mapang meshisema liasü.