Taoba US President George H W Bush süogo

Washington, Luchii (December) 1 (Agencies): United States of America (USA) nung 41 buba President George H.W. Bush arishi küm 94 nung süogo.
“Arishi küm 94 tashi lir külen ozü Kübo asüba osang Jeb, Neil, Marvin, Doro aser ni jashiseta metetdaktsür” ta taoba US President George W. Bush-i Honibarnü sangdong ka nung ashi.
Par kibongi sangdong magütsüdang asür George H.W. Bush atema otongdar Jim McGrath-i Hokolbar aonung Twitter nung tasüba osang lemsatep.
George H.W. Bush kinüngtsü Barbara Bush arishi küm 73 nung asüba sülen ita ti majungdang pa arishi tembang.
George Herbert Walker Bush ya June 12, 1924 nü Milton, Massachusetts nung aso. 1944 nung Second World War mapang pai fighter pilot ka ama shilem agi. Pa ya Congressman ka liasü aser Ambassador to the UN, Central Intelligence Agency (CIA) Director, Ronald Reagan (1981 and 1989) kübok Vice President inyakba sülen 1989 nungi 1993 tashi 41 buba US President inyak.