Taoba US Tir, George H.W. Bush kinüngtsü Barbara süogo

Houston, Rongchii 18 (Agencies) : Taoba US Tir, George H.W. Bush kinüngtsü, Barbara Bush Sangtennü (par mapang) iba lima nungi pilaogo. La arishi küm 92 tain liasü.
Family spokesman, Jim McGrath-i la asüba osangji metetdaktsüogo saka komaser la asüar ibajibo iba osang zülu tashi nung ano mejangjateti liasü.
Kibong ka nungi nisung ana tashi US Tir inyaktettsüsa la akhüm nung anir aruogo aser iba jagi la ya kanga dang nükjidong tulu akaba tetsü ka liasü ta jangjar.
La kinungbu George Herbert Walker Bush (George H.W. Bush) 1989 nungi 1993 tashi United States nung 41buba Tir inyak; iba jakdanga 1981 nungi 1989 tashi pa 43buba US Vice President inyaka liasü.
Ano lar jabaso George Walker Bush (George W. Bush) 2001 nungi 2009 tashi 43buba US Tir inyak; pa 1995 nungi 2000 tashi Texas nunga 46buba Governor inyaka liasü.
Asür Mrs. Bush ya kuo ajak temesüng kümer shi teküp ajak ashidenaka la dak asükümba shisatsü kecha maliasü.
Bush tena 1945 küm Aenjeti (January) 6 nü kibong aküm aser America nunger otsü nung Tir inyakertem rongungi talangtiba apuani na ta ser alibaji tena lir.
“America nungbo mapa (job) tajungtibaji ni inyak. Anogoshiaji jangratemtsü, tzüra atemba, aser khenkhenbo pelatepba mapang dang liasü,” ta White House nung aliba indang 1994 küm la indang jurila kaket nung Wt. Bush-i züluja lir.
La ya tereprangtsü nung tera tantsür mesüker liasü asünung, mapang shia la ya tir kinüngtsü ka masü saka tetsü amai dang repranger ta asayatepa liasü.
Linük yimtiba toktsür oor küm ti sülen Mrs. Bush ya kinungbu den dang külemi liasü aser iba mapang lar jabaso George W. Bush US Tir aküm.
Mrs. Bush-i yimtenren tsütsü kinungbu mapa nung teka amuoka inyaktsü khenyongi memerang.
“Ni pa office den asayamenü masür aser kasaji kinungbuia ni inyakba ki mapa nung mejangjonger,” ta laisa jembia liasü.
Jabaso kinüngtsü, Laura Bush-i ashiba agi, “Mrs. Bush-ji temelibo kanga dang teküprak liasü kechiaser lai bilemba jembitsüji la akseta mebilem. Mapang ka nungbosa ozü tembar ajak den lai sashia jembiogo,” ta “Spoken from the Heart” ta ser 2010 küm adokba kaket nung Laura Bush-i shia lir.
Mrs. Bush-i tanur pongu mesütet parnokji; George W., Jeb, Neil, Marvin aser Dorothy. Jala trokbuba tenüng agi Robin jibo arishi küm 3 asüba mapang ‘leukemia’ tashidak agi 1953 küm süadok.
Mrs. Bush ya Rye, New York nung aso aser la nem mezüng jatsüba tenüngji Barbara Pierce liasü.
La Smith College nung küm ana azüngba sülen arishi küm 19 asüdang naval aviator, George Herbert Walker Bush den kibong aküm.
Alima rara tanabuba sülen Bush’er kibongji Texas nung alitsü ao aser idakji lia Bush yimtenren nung tetsüng ajemok.