Taoba US tir Obama yimden yimsüsüba nung tanaben tetsüng ajemoker

Richmond, October 19 (Agencies): Barack Obama ya mapang talangka yimden yimsüsüba nung shilem magi arua aser White House den mangatettep nungi jenbua arur tanaben tetsüng ajemoktsü.
Arishi küm 56 tain, taoba tir ya Brehostibarnü New Jersey aser Virginia nung Democratic party nungi angh inyaktsü asoshi nübuyimba sentong nung shilem agitsü lir.
Democratic party nung Hillary Clinton tsükdakja Donald Trump White House-i orr küm ka ajungba sülen November 7 nung state ana nung vote agütsütsü.
2018 küm tom nung election agitsü lia taruba ita iba election ajanga Trump’er Republican telok indang noksa sayutsü.
“Taküm election tulu ana dang lir, aser aji New Jersey aser Virginia angh atema alitsü,” ta political science professor Larry Sabato-i osangbener dang ashi.
Iba sentong nung Obama-i kechi osang agütsütsüar anu mejangja. January 20 nung office toktsüba sülen taoba US lenir ya yimdenren tsütsü o intepba nungi atsüngzüka aruogo.
Külen Trump ya White House-i arur mezüng ita 9 tashi Obama administration indang sentongtem raksatsütsü dang inyaka kazü.
Ita asem anisüngzüka kazüba sülen Obama-i pa indang nüngu kaket zülu tenzük. Pai lokti nung aiben mejembi aser interview kata nunga shilem magi.
Obama-i ishiben ola adoka aliba ya immigration, health care aser tzümopung melenshiba amala linük asoshi tongtibang ken o nung dang lir.
Saka US nung 44buba tir ya Brehostibarnü sentong nung Trump anema nokdaktsü südi, kechiaser Trump-i pa anema aiben jembia lir.
New Jersey nung angh menden ya Democratic telok nungi Philip Murphy-i angutsü südi, ta nüburtemi ashir, kechiaser tang teinyakdak Chris Christie ya Trump indang tembar lir aser nüburtemi pa sapuba ajema kümer lir.
New Jersey nung Democrats temi akoktsü, anungji Virginia nung dang kanga sashia tokteptsü. Obama ya Trenton dang nungi Richmond nung tenüngdakba, ta Sabato-i state ana indang yimtiba tenüng tetshia ashi.
Virginia ya kanga tongtibang state ka lir aser southern US state nung 2016 election mapang Clinton-i takok anguba state kaji Virginia ya lir. Iba state ya US yimtiba den anasa aliba ajanga kanga tongtibang lir.
“Virginia nung Republican telok tamakok ngura Trump sashia aitsütsü aser Hillary Clinton busemba state nung pa ya khenyongi mesabur,” ta Sabato-i ashi.
Richmond nung Obama-i Ralph Northam yaritsü. Northam ya taoba mapang mitkartem indang doctor liasü aser Bodhbarnü Quinnipiac poll ajanga ashiba agi, pai Republican telok nung Ed Gillespie madak tera agi vote timba ngutet.
Iba yimti-i Obama aruba ajanga nisung 220,000 dak tali iba nübuyim sentong nung adentsü asoshi ticket alitsü nokdak.
Trump-i Gillespie busemer aser Northam-i Hispanic gang, MS-13 den azüdokshia raraba aser ozüng alema aruba immigrants tem nem tatsükoktsü agütsüba nung yarir, ta aitsür.
Gillespie ya taoba tir George W. Bush indang advisor ka liasü aser millionaire lobbyist ka aküm. Pai Trump nungi bila alitsü asoshi kanga kümdanga inyaker, kechiaser Alabama nung tawa Republican Senate atema toktepba mapang Trump-i shimtetba candidate-i makok.