Taoba WWE star Ashley Massaro süogo

Monupii/May 17, 2019 (Agencies): Nüngtugu model aser taoba WWE (World Wrestling Entertainment) star America tsür Ashley Massaro alima nungi pilaogo. La arishi küm 39 liasü.
New York yimti kübok Suffolk County nung Ashley ya lar kidang ajungbena temang nung timtem ajurua liasü aser hospital-i anir aoba sülen tia makai Brehiostibarnü (16.05.19) la süadok.
Ashley asüba ya kechi ajangar iba osang tejangja metetta mali, saka osang ka ajanga angazükba agi la asüba ya temulung malemba küli kecha dak sendaka mali,” ta TMZ sangdong ajanga metetdaktsü.
”WWE Superstar Ashley Massaro ajungbena asüba osang angazüka onok aoksar aser temulung züreper. 2005 küm nungi 2008 tashi lai WWE nung shilem agiogo aser la den külemi wrestling nung shilem agirtem aser alima ajunga nung fans temi la kanga dang meima liasü. WWE-i Ashley’er kinungertem aser medemertem den mangyin tejashi lemsateper,” ta WWE-i sangdong ajanga metetdakja liasü.
2005 küm WWE Diva Search asayamung, kong küm ka atema dollar 250,000 contract densema liasü, iba nung Ashley Massaro-i takok anguba sülen, lai WWE nung ajemoka mongin jenjang nung shilem agitsü tenzük.
WWE nung shilem agiba mapang, 2007 küm Wrestlemania 23 – WWE Women’s Championship asayamung nung Ashley-i nüngtugu tetsür wrestler talisa Melina den toktepa liasü. Iba kümji Wrestlemania 24 nunga Playboy Bunny Mania LumberJill den Ashley toktepa liasü.
Kasa küm ‘Survivor China’ tetoktepba nunga Ashley-i shilem agi saka series indang episode tanabuba nung la tsükadok.
2007 küm April ita Playboy Magazine indang cover nung la adoka liasü aser ‘Smackdown’ asaya mapang lai telok dang iba osang metetdaktsü.
2008 küm WWE nung Massaro-i shilem magitsü mulungtet. Iba sülen 2017 küm wrestling company tilaka nung ita sen mechi menu ka agia Ashley-i shilem agi.
Taruba hopta professional wrestling convention – Starrcast sentong ka nung Ashley shilem agitsü liasü.
”Starrcast nung shilem agir ajungai Ashley Massaro’er medemertem, kinungertem aser fans tem den asükhu mangyim tejashi lemsateper,” ta Twitter ajanga Starrcast-i lemsatep.