Taochi

Tejen Lai nung taochi tetezü, temaba jenjang menden nung aliri teküpbokba menden nung alir dang tebilemdang lia mesüra meima inyakba lir; ibai maongka sayuba taaka ajar. Tasen Lai nung ibai Tsüngremer temeim agi alangzükba mapa inyakba dang ajar. Tsüngrem temeimi nisung pa tsütsüi anir arutsü aser Pa den tesendaktep yua kümzüka ayutsü asoshi mapa inyak. Tejen Lai nunga iba tangatetbaji tejangja lir, saka tebilemdang kaa ta meyipa amshi. Meimtsü malang; temeimtsü maket saka Tsüngremi Pa chirtem (meimchir) dang odang meima talangzükba mapa inyak. Tasen Lai nung tekümtetji tetenzük nungi tatem tashi taochi ajanga inyak ta jangjatsür, aji saka nisungi taochiji magizüktsü akok ta sayur.

LAISHIBA
Tsüngrem Taochi aser Khrista

T. Ken 84: Kechiyong Kibuba Tsüngrem anü aser jong ama lir. Kibubai taochi aser sentsüwangshi agütsütsü.
Indang indanga jajartem nem Pai tajung kecha sota mayur.
Luke 2:40: Aser tanurji ain, aser tashi itta aküm. Aser pa shisatsü agi asüng, aser Tsüngrem taochi pa madak liasü.
Yohan 1:16: Kechiaser pa teperiba nungi asenok ajaki shilem lemzük aser temoatsü madak temoatsü angu.
T. Mapa 20:24: Saka ni kü alizüng tongtettsü asoshi, aser Tsüngrem taochi osangtajung indang kuli agütsütsü ni Kibuba Yisu nungi tenzüktsü agizükba renemtsü asoshi inyak, ni kü takümji kü sasa senti ta kecha sükshia mali.
Rom 11:5,6. Yamajisa tang mapang nunga taochi agi shimtetba yari tanüngba pur lir. Saka ibaji taochi agi süra, ibaji mapa agi masü, aji mesüra taochiji joko taochi masü.
1 Korint 15:15. Saka Tsüngrem taochi agi ni kechi lir aji lir, aser Pai kü nem agütsüba taochi amajok mangu. Saka ni parnok dang tali ajangzüka inyak, aji saka ni masü, saka kü dak aliba Tsüngrem agi ni inyak.
2 Korint 8:9. Kechiyong asen Kibuba Yisu Khrista takar liaka, aji saka Pa sensakba agi nenok takar kümdaktsütsü asoshi Pai nenok atema sensaker aküm, iba taochi nenoki metet.
2 Tim. 1:9. Pai asenok kümzük, aser temeshi ajaba agi asenok aja: asen mapa amato masü, saka Pai mulungba aser taochi koba tetenzük makaba mapang dang tamasa Khrista Yisu nung asenok nem agüja liasü.
1 Peter 5:5. Aji odasa, nenok asangurtem, nenoki tamburtem kübok liang. Au, nenok ajaki peisasa, medemeri medemer tenzüktsü ajemalu agi nangri kangang; kechiaser Tsüngremi asükümer nokdanger, saka ajemalur nem taochi agütsür.
Oh, Oba Tsüngrem , Khrista ajanga kü dang Ne taochi sayu nung Ne tenüng asanger. Amen.