Taochi agi sünga aliba Tsüngrem 

Aser shirnok  teti tatem maka taküm asoshi Pa dak amangtsü, parnok dang tatishitsü asoshi, Yisu Khrista Pei talangka aremzükba ajak kü dak, tongtiba ama, jungkai adokba sayutsü aji asoshi ni yimlibilem angu”. 1 Tim. 1: 16.

Tsüngrem taochi agizüker rongnung Paul-a liasü. Damaska lenmang nung Tsüngremi tesüngmangtsü inyakyim sayu. Kari ashir, Pauli temenen ulura mena nung iba anogo nung, “Tsüngrem, temenenba dang aochiang!” ta Pauli ayimten. Saka iba anogo nung tayimtenba mali asü, kechiaser kodang Khrista kangki nung asü Tsüngremi taochi talubosa sayuadok. Khrista ajanga Pa dangi arur ajak dang Pai talubosa taochi agütsür.

 Taochi dak alaka Pa tanga ka asütsü makok, kechiaser ibaji Pa jakla lir. Asenok ama Paul Tsüngrem taochi tzülok nung noktak aser iba tzüsem nung chigua meshitet. Temenenpur kati  Tsüngrem dangi arua Pa taochi agujang ta mepishitsü kecha tarendaktsü mali. Pa taochi ayimba tetangdang mali; kechaia noktangtsü makok ayimer!

Nisungi iba ayong jagi arutsüla, kechiaser yangji  meshitoktettsüsa kecha temenen mali, memerüktettsüsa ar kecha mali, tamakok kecha teti asoshi mali, aser Tsüngrem taochi metongtettsüsa aibelen kecha mali ta angatettsüla. Tsüngrem taochi-i ajak meshitettsür. Tayindangba  sü shidangogo.  Kümtetdakba taochi menden nung mena lir, koba nungi ayong ayimer; shirnoki tamang agi pungok ajak shidoktsür.