Taochi Temeim

“Aser Kibubai kü dang ashi, Ano oang, züngatsür ka shiba la tembari meimer aser nüktapangtatsür ka lir, la meimang; oda Israel Chirtemi tangar Tsüngrem dangi meyipaka aser kismis amtsük meimaka, Kibubai parnok dang meim ama, nai la meimang” – Hosea 3:1.
Tsüngremi pa chirtem meimba meimchiri mangajemer. Tsüngremi kecha telatet makai meimba temeim asenok meimchir telatet temeim agi tsükdanger. Asenoki Hosea taküm nungi iba temeim noksa angutsü akok.
Hosea temeshi nisung ka liasü, saka Tsüngremi temenentsür ka den satitsü ashi. Hosea tashi anga, Gomer pa kinüngtsü asütsü agi. Pai la peladaktsü aser akhüm tsübua tushia amshi. Gomeri iba ama temeim ngua maru, saka lai yakta temulung mesüi aküm. Lai la temeim tangar ka nem agütsütsü tenzük. La tenük tasen adokba tangar tebur meim. La nüktapangtatsür ka aküm aser yakta Hosea toktsü. Tangari la kecha maka tashi amshir toktsü. Aser tangari la alar ama ayok. Iba sülen Tsüngremi Hosea nem tesüngmangtsü ozüng ka agütsü: “Oang aser la tanaben alizükang.” Gomeri pa agütsüba toktsür Gomer dang tai atoktsü aser jenjang agütsür la tanaben anir arutsü Tsüngremi Hosea dang ashi.
Tsüngremer osangji tejangja. Kodang asenoki Pa sentoker aser tangar lenmangi meyiper, nüktapangtatsüri yirutsüba ama asenoki Pa yirutsür. Asenok mejungia Tsüngremi asenok asoshi inyak, asenoki sentoktsübaji tangatettsü tasak. Asenoki Pa sentokaka aser tashi mangaka Tsüngrem temeim sentokba angatettsü tasakba lir. Pa temeimi asenok temenen punglang tashi lua tanaben anir maru tashi bushir. Tsüngrem temeim asenok temeim dang nungi balaka. Kodang asenoki Pa nungi jena odir, Pai maneni asenok anishir. Kechi koma masadangtetba temeim Pai asenok dang sayur !