Taonung ‘Earth Hour’ nung shilem agitsü mepishir

Kohima, March 18 (TYO): Alima nung linük 172 den külemi Nagaland-ia ‘Earth Hour’ nung shilem agitsü; Earth Hour ya World Wide Fund (WWF) alima tzü-mopung atema alima linüktemi agiba mapatong ka lir aser iba nung ya nüngdak maliba light tem ghonda ka shibangba ajanga alima tesem ajaklen nungi nübortem longjemer alima tsüngsang-mopung melenshiba anema noktaktsü, ta Chief Engineer (T&G), Er. K. Miachieo-i Hokolbarnü sangdong ka ajanga metetdaktsü.

Taküm Earth Hour ya Honibarnü, March 19, 2016 aonung 8:30 ako nungi 9:30 ako tashi asütsü. Gas tamajung adokdaktsüba ajema kümdaktsütsü atema India sorkari tenangzükba agiba pusema Earth Hour 2016-i sensotem dang iba mapang nung menüngdakba light tem shibangtsü aser rooftop solar systems indang tali angazüktsü ajungshir.

“Onoki Naga nunger sensotem dang March 19, 2016 aonung 8:30 ako nungi 9:30 ako tashi kidang aser tongibang building tem nung menüngdakba light tem shibangtsü mepishir,” ta Er. K. Miachieo-isa mepishia metetdaktsü.