Taonung nungi tenzüka Nagaland ghonda 18 mokdangtsü

Dimapur, November 18 (Agencies): Hombarnü North East Forum for Indigenous People (NEFIP) indang Nagaland unit-i Kin hohotem, shishilembar teloktem, Naga Mothers Organisation aser tanga lokti aika den senden ka amen.
India sorkari kanga dang tekong meranga Parliament indang Winter Session nung Citizenship (Amendment) Bill, 2016 benoktsü aliba dak ajemdaker iba senden amen aser senden nung adenertemi NEFIP aser JCPI, Nagaland teloktemi Nagaland ajunga mokdangtsü ayongba nung yariteptsü telemtetba agi, ta NEFIP Vice President, Theja Therieh-i sangdong ka nung ashi.
November 19, 2019 nikongtsütsü 6:00 ako nungi tenzüker November 20, 2019 anüngdang 12:00 ako tashi Nagaland ajunga mokdangtsü lemtet.
India sorkari Northeast tesem aser talisa Nagaland nung alirtem taginüba anema inyakba aser mezüngmeshiba atema iba mokdang alitsü ayongzüker. Parliament nung ashishitep aketba CAB ya agizükra, iba ajanga Northeast nung lisopurtem indang rongsenkettsüng, maitsü, sobaliba aser temetentem tangari ajembangtsü. Tamangba yimsü nung ajemdaker yangluba bill ya Indian Constitution anema lir aser iba ajanga ozüng alema arurtem India nung küm 6 dang lirbo, asenok ama senso melamela akümtsü, ta sangdong nungsa shia lir.
Asenoki iba bill magizüker ta sayutsü atema nisung ajaki mokdang nung shilem agitsü ayogzüker aser iba ajanga India sorkar dang Northeast nung lisopurtem bendanga mamshitsü atema osang takang ka sangoktsütsü, ta NEFIP Vice President-isa ayongzük.
Külen, Joint Committee for Prevention of Illegal Immigrants (JCPI)-ia tanga sangdong ka nung Nagaland mokdangtsü osang metetdaktsü.
North East Forum for Indigenous People (NEFIP)-i state unit ajak dang külemi longjemer CAB anema lungkak aittsü tetuyuba agütsüogo. Iba Bill ya Act kümra, Tripura nung ama North East state nung lisopurtem ya pei lima nung telok tilaba akümtsü, ta JCPI Convenor K Ghokheto Chopi aser Secretary Tia Longchar nati sangdong nung ashi.
Asenoki CAB magizüker ta sayutsü atema JCPI-i November 19 nikongtsütsü 6:00 ako nungi November 20, 2019 anüngdang 12:00 ako tashi Nagaland ajunga mokdangtsü. Anungji, Nagaland nung aliba senso ajaki timtem arema, India sorkar dang ashishitep aketba CAB 2016 agienang ta osang ka sangoktsütsü atema iba mokdang nung yariteptsü mepishir. Dokan kiburtem aser shishilembartemia lungkak aitba sayua shibangtsü mepishir, ta JCPI-isa metetdaktsüogo.