Parliament indang Winter Session tenzükogo

New Delhi, November 18 (Agencies): Hombar nungi Parliament indang winter session tenzükdang Trinamool Congress aser Shiv Sena teloktemi linük nung rongsenkettsüng tebilemtsü benoka olemteptsü atema asüngdang aser Opposition bench temi Jammu-Kashmir tensa atema yimyim agütsü.
Trinamool Congress aser Shiv Sena teloktemi Rajya Sabha chairman Venkaiah Naidu nem notice ka agütsü.
Farooq Abdullah-i House session nung adentsü mela-ang ta Opposition-i sorkar nem takhangba agütsür. Tanü Congress, National Conference aser DMK nungi MP temi Lok Sabha takdang tiyongtsü nung adenshir lungkak ait. Külen, Shiv Sena MP temi Maharashtra nung aluyimertemi timtem ajuruba atema senden nung medeni kimai alu.
Prime Minister Narendra Modi-i Rajya Sabha indang 250 buba session nung o jembidang “Rajya Sabha ya kodanga mesamatsü kechiyong khen dang meloksa aser Rajya Sabha ajanga India temeyoktep atema noktaker” ta ashi.
Tanep Lok Sabha aser Rajya Sabha tenzükdang taoba Union minister tem Arun Jaitley aser Ram Jethmalani, taoba external affairs minister Sushma Swaraj aser taoba CPI lennir Gurudas Dasgupta nunger nem tetushi agütsü.
Rajya Sabha Chairman Venkaiah Naidu-i okila jembidang “Parliament ajanga linük nung lokti aser rongsenkettsüng renlokdaktsüba nung tongti shilem agiogo” ta ashi.
Rajya Sabha indang mezüng session ji May, 1952 nung agia liasü aser iba nung tenzüker küm 67 tashi khen danga methitemi iba session agiyonga arur, ta Naidu-isa metetdaktsü.
Rajya Sabha nung session tiptema agiyonga aotsü atema züngsem ajaki o atsütepba nung shilem agitsü mepishir, ta paisa ashi.