Tapet nisung nem tapet konang naroküm agutsütsüji kangasa tapet

– K.Lima Longkümer, Chumukedima.

Küm asemshi (3) tejakdang ABAM kübok Arogo kar nung Arogo nung tongti tenzüker arishi küm 60 ajungerbo ordain mesütsütsü ta angashi, iba osang jagi kü mulungjang nung tasüngdangba aika agi kongshi. Nisung ajak arishi küm tain nung aser taküm libalirua arudang tensa tia palala ajurur iba jagi nükjidong melenshir aser karbo alizüng-a matonger, saka yimya agi Bible/Theology azüngertem ya pa/la masü tashi mesüra par tashi agi akok tashi Tsüngrem tenzüktsü nangzüker aser pei Arogo Pastor ajanga recommendation certificate (kuli kaket) agüja sarasademma meshitetsür tazüngi yoker aser ano Arogoi Book Grant-a agütsür, saka secular makamait kibong nungi tanur tekolok tajung adoker nembo sen agütsütsübo toktsür sarasademi aotsüa meshisateter Arogo tesa lir. Tanü Theologian ajungai Pastor mapa inyakner, ajaki Reverend aser Doctorate degree aginür saka Reverend-ji ajak dakbo mapettsü südi. Tanü Arogo tenzükertem reprangra nisung tejak repranga inyakba angur, kanga tetemsü nisung sürnung pa/la arishi küm roker ajungerji pa ordain mesütsüli ta asüba kuliji Laishiba nung zülua alia asü, Lai koba tapu nung zülua ali ? Pei tashi agi kokerbo masü tashi Tsüngrem tenzüktsü Arogoi kuli agütsür tazüngi yoknung, sürapang shirsa küm 60 jungogo, parnokjia overage anungji parnok dangjia meyipa meshia ayutsüla masü na ? Shir ordain agütsügo parnok ordain sütsüyonga parnok nem Arogoi Reverend allowance magütsür, tanü Arogo kariii ordain asür nem pension benefit agutsür südi, saka ajak compulsory-bo masü südi, ajibo pei local Arogo mulung, saka nibo agüjang tabo mashir. Tsüngremi asenok nem nisung shia nem peipei dak ape sempet agüja lir saka asenoki indoker aser raksar tangashi,Tsüngremmibo miyipa memeshir, tetetzü permanent agütsü aji asenoki anagtettsüla.
Tanü ni shinübaji paibo koktetsüar ta asüba nung masü saka pa/lai shitak litetogo aser pa/laibo ano shitak koka inyaktetsü ta reprangtetba dak rangloker Tsüngrem nem bendanga agütsür tenzükdaktsür. Asen limai Clark-kibong marudangyongi papo REV/DR kümmer aru, par dak nungi asenoki aika angazük anungji Tsüngremmi par kibong ajanga tanü asenok nüji kümdaktsü, iyongji asenok rongnungi tamarener aika adokogo. Arogotemmi kuli agütsüba dak ajemdaker asen Aor aika Reverend tajung moatsügo, anungji tanü joko ABAM-i THEOLOGY MAZÜNGAKA tetemsür/tapeter nembo ABAM-i Theological college ajanga HONORARY DOCTORATE degree agutsüdaktsünüa iba shidi ajanga lemsateper. Item tetemsür tenüngtemji ni tenüngbo iba olemsabang nung magütsür saka kü diary book nung züluoka lir, anungji tarutsü lanur ajungshitsü nükla nung iba mapa yapo mepaitoktsüla ta küm aika shisadanga arur, tanü iba shidi ajanga lemsateper. Anungji ABAM mesüra NON GOVERNMENTAL ORGANIZATION kar ajanga kü indang Mobile ajanga asüngdangdaktsüner M.No. 9402867797.
Taoba ita Mrs. Meyisongla Rtd. Dy. Director Nursing Nagaland Kohimai “MAPA MERANGA INYAKBA KONANG” ta ser züluba nung Mr. Imkümzükba, Asangma yim nungi, pa nem award agutsütsü langa lir ama reprangteter ta sangtongba nung nia pusemmer, kechiyong iba adianu ya Arogo/Lokti/kija shingaia sponsor mesüi peisasa meranga Missionary mapa inyakba Aor lanur rongnung paa ka lir.
Ano Mr. T.Meren Paul Kohima-i Tir Yimyim June 25, 2017 adok nü tsürabur Yashitsüngba Aier (Süngratsü) nem Life Time Achievement award agutsütsü langa lir ta lemsatepba, item tebilemba ana nungji kanga shidak mapang ka nung ola adoker ta nia tena tebilemba nung pusemmer. Aser nia tsürabur Yashitsüngba Aeir nem pa dak alang NAROKA tenüng kar agütsür.
1. Putuyanger Aier – Arishi küm 90 tema arishia lia arudang pa mapa tanula meraksai putu asem pezü tashi nübur yaria aruba atema.
2. Limatenzük Aier – Yimten aser Arogo tia ajak nung pei nübur meimba tanüla tajung aliyong Hospital ana asem tashi yanglua Naga nunger aser pi bendanger aika nem taneptsü agutsütagi LANLIA takar tajung ta asenokia pa taküm tajung alidangi moatsüdi. (Ni tsürabur taküm ya mengudang saka tawatu TYY/NP nung Sunday adok nungang angu, saka pa mapabo tajung dang angur.
Asen Aor senso tajung kar nem pi countries aser States-i par mapa dak alang Honorary Doctorate Degree agutsübaji asenok-ang konang lir.
Parnokji:-
1. Dr. S.C. Jamir (Governor)
2. Dr. M. Chuba Imsong
3. Dr. Maongwati Aier
4. Dr. T.Lima Jamir
Tanü tashi asen Aori asen nisung nem pei dak alang Naroküm/Hon.Degree agütsüba mangur, anungji asenoka tang nungi tenük mulong lapokdi.
“TESANGWA AGÜTSÜBA MILEN KOBAI KIDANG ALIR DANG MASÜ SAKA TANGAR NEMA SANGWATSÜR , AJI MOLOK TELONG NUNG AYUTSÜ MAKOK .”