Tapir Gao’er kima mapa tamajung inyaker nisung 3 apu

Itanagar, June 3 (Agencies): Arunachal Pradesh BJP president Tapir Gao’er kima nung gari ka rongdoktsüba ken o dak sendakba nung police-i nisung 3 puogo.
Iba ya Permanent Resident Certificate (PRC) onük nung ajemdaker inyakba liasü ta police-i ashir.
Hokolbarnep nisung kati gari anir aru aser Tapir Gao’er ki jakdang anener rongdoktsüba sülen azü ka tepset.
Iba nisungji Tongam Jomoh (42) ta jangjaogo aser pai pa indang gari rongdokba den azüjia pa indang liasü, ta Capital SP Tumme Amo-i ashi.
Iba dak sendakba nung police-i nisung asem apu aser parnok dang asüngdangya asüdang Jomoh-i ashiba agi “PRC tebilemtsü ya Gao-i adokdaktsü aser paisa taküm assembly election mapang non-tribals ana nem party ticket agütsü” ta ashi.
“Tapir Gao-i non-Arunachal Pradesh Scheduled Tribe (APST) nem permanent resident certificate agütsü aser paisa deputy chief minister Chowna Mein aser Lekang constituency nungi BJP candidate Jummum Ete Deori na nem party ticket agütsü. Tena ya non-APSTS lir” ta Jomoh-i police dang ashi.
Taküm February ita PRC onük ajanga Arunachal Pradesh nung tensa mejungi aküm.
BJP sorkari Arunachal Pradesh nung lisopurtem masü saka küm aika liyonga arur kin 6 nem PRC agütsütsü bilemer ta osang sangoktsüba sülen Itanagar aser Naharlagun tesemtem nung nisungtemi lungkak aittsü tenzük.
Jomoh ya Deobarnep Assam kübok Lakhimpur district nung apu aser pa den yariteper nisung anaji Honibarnü apu, ta SP-isa metetdaktsü.
Pa den yaritepetem Deo Tayem (24) aser Gayam Pao (25) na Honibarnep Naharlagun aser Pappu Nallah tesemtem nung apu.
Par asemprongla ya East Kameng district kübok Seppa nung alirtem lir.
Tayem aser Pao dang asüngdangya asüdang angazükba aser intelligence reports nung ajemdaker Assam kübok Kasikata Bagan nung Jomoh apu, ta Capital superintendent of police Tumme Amo-i metetdaktsü.
Iba onük atema Altab Hussain (30) ta ser driver ka kuliser ama apu. Ajisüaka, pa dang asüngdangya asüdang pai iba tatalokba indang kecha memeteti liasü aser iba jagi pa chiokogo, ta Tumme Amo-isa ashi.
“Parnok ya telungpur mesüra political telok kari ajungmesoa inyakdaktsü asü masü’ar meshitettsü. Parnok police ket nung lir aser asüngdangya asüba sülen ang osang tejangja metettsü” ta paisa ashi.
Parnok ket nungi mobile handset 5 aser parnok jena aoba gari puogo.
CCTV footage tem nung anepdang 6:00 ako meta Gao’er ki jakdang gari mi agi rongdokba aser azü ka tepsetba menüngoka lir.
Taküm Lok Sabha election nung Gao-i Arunachal East Parliamentary constituency nungi takok angu.
BJP state unit-i iba tatalokba khukhua aitsüogo aser ketdangsertem dang ozüng alema inyakertem merenshitsü atema takhangba agütsü.