Tar Nunger Otsü Kaket Ka English Oshi Nung Sayaogo

Noksa achiji nungi abelen tashi nung Kaketzülur Talitemjen Imchen, Kaket Sayatsür Wb. Lipokmar Tzüdir, Director NEZCC, Heritage Publishing House Kibur Dr. Lanusangla aser Heritage Publishing House Editor & Book Translator Dr. Asangba Tzüdir nunger angur.

Dimapur, Oct. 06 (TYO) : Kaket Zülur Talitemjen Imcheni 2013 küm Tar Nunger Otsü, “Tesüibaji Tarutsü Milen” ta ser züluba kaket English oshi nung, Myths of the hills titled “The Past Is The Beacon Of The Future” ta kaket yanglur, tanü Wabong Lipokmar Tzüdir, NEZCC Directori  pa office nung sayatsüogo. Kaket sayatsüri kaket meraket indang ashidang, kaket kaji shisatsü rizüngdak ki lir. Tanü lanurtem shisatsü nung pei taküm peria alitsü asoshi kaket meranga azüngtsü nüngdaker. Naga nungertem zülu maka tepang belentep ajanga dang otsütem rezünga aru. Iba jagi tesüiba tsüraburtem mapang liyonga aruba tatalokba otsütem aika tejangja maka, saka itemji tar nunger otsütemi abensadaktsür ta ashi. Paisa iba kaket atema tenüngsanga ashidang, kaket zülur aser kaket English oshi nung meyipertem dang anibelem jenti agia inyakba atema pelaba shisem.
Kaket English oshi nung meyiptsür Dr. Asangba Tzüdiri ashiba agi, oshi ka nungi oshi ka nung kaket küma meyipzüktsüji mapa tasak lir. Talisa English osep nung jayajako peria maliba tar nunger otsüren ka tejen sobalibaren nung English agi otsü yanglutsü tasak liasü. Atangji ozü asempronglai otsü oren ajakji tajungtiba nung bener arutsü meranga meyiptettsü merangogo. Iba kaket yagi ano sobaliba nung tashi itshia naga lanurtem asendentsü imlar.
Kaket züluri NEZCC sanga jembidang, Myths of the hills titled “The Past Is The Beacon Of The Future” kaket küma sayatetbaji, kaket sayatsür Mr. Lipokmar Tzüdir NEZCC (North East Zone Cultural Center) Directori anir, pa lenisüba küpok alir ajak ajongba agi lir. Naga limaji karaa ainer ta jembiaka aser nguaka, ano kaket zülur atema peii meranga inyakba ama mesüi, rongsen lenmang nung timtem kanga ajurur. Iba TAR NUNGER OTSÜ kaket Ao oshi nung, “Tesüibaji Tarutsü Milen” ta ser otsü semer 2013 küm adokdang, Bendang kintemia tejen otsütemji kanga züngner ta ashi. Ano Aor chanu aikati tejen otsütemji kanga züngner saka Ao oshi azüngtsü tasak lir ta sensaksema liasü. Saka lanur jenti agi züngnüa jangrapangraa liaka, iba kaket Ao nungi English agi meyipzüker adoktsübaji, pai pongmang nunga mepongmangsemi  dang doktsü ta shisem.
NEZCC officei kaket zülur dang kaket menüngba nung yaritettsü ta maongka agütsüba sülendang, kaketji tajungtiba asütsü atema translators tajung bushitsü tenzük. Tia junga Naga nunger rongnung aser alima ajonga nung, kaket zülur asoshi Ao nungi English agi meyiper tajungtiba asem, Ms Anenla Jamir, Dr Chubatola Aier aser Dr Asangba Tzüdir nübu ngua, kaket züluri aginüba ama parnoki meyiptsüogo ta tenüngsanga ashi. Ano Nagaland nung kaket menüngdak jenti liaka, ISBN (International Standard Book Number) jenjang nung kaket adoktettsüsa, Dr Lanusangla Tzüdiri Heritage Publishing House, Dimapur nung lapoka akaba yong, iba kaket Nagaland nung menüngtettsüsa maongka angu ta ashi. Tanü iba kaket English agi adoktetba ajanga, “Tar Nunger Otsü Meimer” ajak temoatsü angutsü imlar. Talisa kaketriju nung alirtem asoshi, “Tar Nunger Otsü Kaket” English oshi nung adokba yagi lenmang tulu ka nung yaritettsü akok. Iba den Aor chanu asoshi English aser Ao metemdanga azüngdangji, Ao oshi meteter nütsüng tali züina aotsü tamang akar ta kaket zülurisa ashi.
Iba kaket jenjang 300/- agi alitsü aser item dokantem nung angutsü.
1.    Dimapur :- Heritage Publishing House, Christian Literature Center, Modern Book Depot, Om Books
2.    Kohima : – Western Book Depot.
3.    Mokokchung : – Eastern Book Depot & Students Book Center aser
4.    Changtongya Town: – Classmate.
Iba den külemi kasa dokantem nungji, kasa Authori Ao Oshi nung züluba item kakettem angutsü. (i). Tar Nunger Otsü “Tesüibaji Tarutsü Milen” 2013, (ii). Tar Nunger Otsü Vol II “Tesüibai Akokshir” 2014 aser (iii). Kentet (Ao Quotations) “Kechisarinai Taküm Dak Tuiter.” 2015.