Taremzük asoshi tatasaba (T.Ken 51)

“Na tatok agütsüba Tsüngrem saka kodang parnoki tai lemangi odir Nai parnok merenshir.” (T.Ken 99:8).
Yisui jangratemtsü O ka nütsüngtem dang ashibaji “Ni nenok dang joko kilir ta majar… Tang nenok Kü tembartem lir” (Yn. 15:15). Iba mapang nütsüngtemi iba tetezü ajungajibo mangatetti alitsü südi. Yisu tembarchi lir. Easter aser Pentecost sülen Tanela temeshi ain ajanga nütsüngtemi tembar tetezüji tarokba angatettsü tenzük. Tanela nung Yisu den tembar akümbaji parnok taküm nung Yisu jakla balala ajanga sayu. Item jakla rong nung taremzükji ka lir. Khrista den küm 60 tema jajar külen Tenyar Yohani pa taküm tatembang nung “Yisu timtem nung tembar ka liasü” ta sangtong (J.Adok 1:9).
Ajak Takoksang tenüngji “Taremzük Tsüngrem” lir (Rom 15:5). Khristan takümji tasemteper, ibai taremzük agi asemtsüla (Ibri 12:1). Tatasa aliba aser talangka aremzükba Khristan kaji tashi tait Khristan ka lir ta Pauli ashir (Kol. 1:11). Tanela Temeshi süngjang rongnung talangka aremzükba terokbuba nung lir (Gal. 5:22,23). Khristan temeim nung ibai mezüngbuba jenjang nung agüja lir (1 Kor. 13:4). Tanelaren tabensa kümdaktsüba ainji talangka aremzükbaji lir (Yakob 1:4). Tatasa maliba agi nisungi paradise sama. Wara ka ama shi jangraba temenenji ajaklen lokti tentet nung lir aser kinük ajak nung arogo arakmoker. Shisalemsaba lima tali aremzükba tetezü teraksa tilaba. Kibong taküm nung talangka aremzükba tetezü teraksa kibong tajemba. Lendi lemjem nung tali taremzük tetezü mozü kidang timatemer ishiba. Khristan taküm nung taremzük tali tetezü arogo tashi mati tajemba. Khristan mapa nung tali taremzük aliba tetezü shi-i mulungba inyakyim tajemba. Asenok timtem tatsüba akümtsü lemang tajungtibaji talangka aremzükba.
Kodang asenoki maremzükdir asenoki ajak samar. Aseni inyakba mapa tajung ajak ken maremzükdangi inyakaba mapa kati ajak samatsür. Tanü putu taremzük akatsübaji tasak. Nai aremzüktsü telemtetba agidang iba raksatsürji jenti arutsü. Taremzükji techiok. Temeshipuri Satan madak takok angubaji taremzük ajanga lir (J.Adok 13:10; 14:12). Taremzükji ain.
Ayi ma lemang nung ken aremzüka jajaba shisabulu tetsüng jagi hon yimlongleni anir.
Oba, taküm lenmangji temela masü ta metetta aremzüka jajatsü Ne taochi-i ni aniang. Amen.