Taremzük- Patience

– Mrs. Meyisongla,Rtd. Deputy Director, Nursing khm.

Taremzük ya naro ka lir koba ajak tsüki nungbo maponger. “Patience is a flower which do not grows in everybody garden.”
Taremzük ya tanüla sempet rongnung kanga tongtipang ka lir. Saka nisung ajak dakbo taremzük mali.(The quality of being able calmly to endure suffering, toil, sustaining pain). Taremzükji shisa talangertemi dang mapang ajak nung aremzüker parnoki asadanger, angateter bilemdanger aser aremzüker. Lipok 37. Yakob (Israel)er japaso 12 rongnung Yosef 11 buba liasü. Pa ajak nung tetemsü aser ajemalur. Tebui pa kanga tali meim. Iba jagi tedi (brothers) nungertemi pa majinü aser kanga sempa. Yosefi pungmang ka pongmang. Parnok ajak alu nung tsükpong langya liasü aser Yosefi alangba tsükpongji indang indanga nokdak aser tedi nunger tsükpongi Yosef tsükpong meketa nokdak aser parnoki apudaka külem. Ano Yosefisa tanaben pungmang ka pongmang, iba pongmang nung ita, anü aser petinu terkati pa madang apudak. Iba atema tedi nungertemi pa dak tenük kanga merem aser sempa aser pa Ishmael nunger dang ayok. Aser pa Ijip limai anir oa Farao chuba anüker arkotong Potifar dang ayok. Küm aika süia or, alima nung ayawara tuluka aru. Idangji Yosef tedi nunger par ter (10) Ijipi tsük alii aru. Yangji Yosef Ijip rongsen ajak madak kibur kumer alima ajak nungi tsük alie arurtem dang tsük yokya liasü. Idangji pa tedi nunger arua Yosef tsüngdang apudak. Parnokibo Yosef majitet saka Yosefibo tedi nonger ajitet. Idangji Yosefi pai akhidang pungmangba to bilemtet. Lipok 42:24. Yosefi parnok toktsür oa ajeptsü tenzük saka pai parnok dangi arua tanaben jembi. Lipok 3:26.kodang Yosefi Benjamen angu aria bilem.3:26 Parnoki pa matsüngdang apudak. Yosefi pai akhidang pungmangba tosa bilemtet. Pai tedi nunger dang aria bilem, parnok dang temeim aser taremzük tulu sayu. Taremzük melira, temeim, tepela, tesünep, kümli tajung, ajemalu aser peisasa azüokbaji kodanga tapensa masü. Aluyimer alu junga meyimtettsü, school azüngertemi takok tajung kodanga mangutsü asük asa arema, yakta sakaa lesson azüngtsüla, terabo menua lesson azüngtsüla mesüra junga takok mangutsü.
Azümongshi ya kanga tekera shiruru ka lir. Aser kerai (tortoise) onsa anüa jajar. Tena asemteptsü jazük. Azümongshi kanga kara asema orr len tom nong mejang, saka kerai maneni aremzüka jajaa alizüngji pai tama atong. Iba dangji taremzük süngjang ta ajar. Ninang kati mojitsü spoon ka bendentsü naro 4000-5000 semdanga mojitsü bendener. Ken mapang ka nung asangur kati tula ka arütsü agütsü, saka tulaji pai aginüba ama marütetji pa kanga jashir, tulaji kenji kati mejipsa, aser sü arüsang dak kanji jagi atsüng. Iba atema rongrong kanga tuluka adok aser olulu agi town sünga prokshi. Kin ana tsüngda raratep tulu adok. Nisung aika timtem tulu ajuru, taremzük maliba lendongji yamaji lir. Efesa 4:1 talangka aremzükba agi temeim nung medemer o medemer na azüzüktepa aser tesünep talenba nung tanüla telongjem agutsü meranga, koba ajaba agi nenok aja iba ajaba temsüa jajatsü nenok dang ni mepishir. Yakob. 1:3 nenok tamang atidangba agi taremzük adokdaktsür. 19th century nung asangur chanu ka molungjang nung pa kaket zülur ka kümnü. Pa dak iba sempet keta liasü. Saka tia maka, pa class 5 nung azüngdang tebu (father) sentsü yong küm pezü jail nung puoka ayu. Teyari maka pa schooli moutet, anungji kanga yaseta timtema senzü. Tesülen koya mesüba ki ka nung bottle nung label maloktsü mapa angu. Yangji inyaka pa aya anen. Pai aiben paibo kecha meimyaktettsü ta bilem. Pai article ka zülur agütsü saka magizük. Tanaben tasemben yamaji züluaka magizük. Tesüsa pai anosa articleji zülur, shingaia mangudang ayaterem nung post office-i orr ibaji post asü. Iba article Editor jagi junger ta agizüka ayu. Ibai pa atema tesangwa window lapokbaji liasü. Pa kanga pelaa tasü itshi aser pasasa pa dak tamang aka. Tesülen pa kanga nüngtugu kaket zulur ka aküm. Taremzük süngjangji tepela aser temoatsü. Pai maremzük asübo pa yamaji tepetzük tia nungi kanga akümket nüngtugu nisung mekümla. Paji Charles Dicken, England nunger. Meranga inyakbaji ayipjanga mejangtsü mozü tajungtibaji lir. Ayipjanga mejangra pelaa anema alir.
Korea tsür Myo-buni. Tanur matamabensar “cerebral palsy” tanur ka aso, temang tulu o mejembiteter, menokdakteter, saka tekolok kanga tajung tanur ka liasü. Korea nung matamabensarbo junga alir tanur azüngdak school nung külumi mezüngdaktsür, saka Myo-buni par japaso tanur tajungtem azüngdak dang kanga züngdaktsünüji, lai school seatji asüngdangjen asüngdang nung tesayuri pai tangar tanur meyurütsülima ta asüngdang, masü ni pa junga anüktsü, nenoki pa window ka anasa mendakjang aser table pa atema balaka tuluka agüjang ta ashi tesayurtemi yamaji inyak. Lar yimdak nungi schoolji kilometre 30 liasü. Anepdang shia lai tanurji süloka ponger school jagi aor, anogo tepiyong window-bang nung nokdaker lar japaso pencil tsükdang shia arua agütsü, chiyongtsü chiyongdakja, metsümeshilen anir senzüa yarir class temer ano lar japasoji ponger kidangi oli ta kanga taremzük agi School azüng tepiyong yamaji aremzüka class 10 pass asü. Ano Seoul National University nung master degree agir, pa yangji mathematics tutorial mapa Seoul National University nung inyaktsü maongka agütsü. May ita 1994 küm Mr. Yongjung aser pa kinüngtsü Myo-buni tena nem Seoul sejong cultural centre nung”PARENT OF THE YEAR” ta zülur tetushi tulu agütsü. Iba benjong nung President Kim yong sam aser Prime minister Lee-yong duck tenati certificate tajung Hun-ki nem agüja tushi. Pa cerebral palsy aketer mezüng school junga züngteter liasu. Pa sülenbo pa ama cerebral palsy aketer nema school seat agüja Seoul nung züngdaktsür. Myo-buni taremzük agi lar tesopet japaso ka junga alir tanur aika ajateta züngdaktsüba konangji alimai kanga pelaa züngshir. TAREMZUK-VALUE