Taro-i mezüngbuba ATP Title koktetogo

Monupii 7, 2018 (Agencies): Japan nunger asayar Taro Daniel-i Amungnü Istanbul Open final nung Tunisia nunger Malek Jaziri 7-6(4), 6-4 agi koka mezüngbuba ATP title koktetogo.
Daniel iba asayamung nung shilem agidang jenjang 144 buba nung aser Jaziri ya jenjang 78 buba nung liasü aser tenaprongla atema iba asaya ya ATP final mezüngbuba liasü.
Jaziri-i final tongteta asayaba mapang World No. 4, Marin Cilic dena kokteta liasü, pai asaya kanga tashi ita tenzük aser game 5-4 agi pa tejakdang liasü, saka arishi küm 25 tain asayar Taro-i pa dang nungi tajungba asayateta tiebreak ajanga mezüngbuba set akok.
Tanabuba set nungbo Daniel tejakdang sür asaya. Game 5-4 ta kokteter aliba mapang nung Daniel-i match point asem tashi nguteta liasü saka point asemprongla ya laluba sülen pezübuba nungang pai tanabuba set koktet.
“Ni kanga pelar. Tanü asaya kanga tajung liasü aser asaya tetenzük nungi tatembang tashi nung aiben rally talanglang asayaogo,” ta Daniel-i asaya akokba sülen ashi.
“Ni ajungbena dang ATP (title) ka koktetba ya kanga süngmanger aser kanga pelar. Ajisüaka iba amala ya odang ataloker ta ni bilemer,” ta paisa ashi.
Iba title akokba sülen pa jenjang 82 tongtetogo.