Taruba election-jia kecha teratatsü mali: Imtikümzük

Ungma, Nov 5 (TYO): Nagaland Deputy Speaker, Wb. Imtikümzük Longkumer congress party nungi Naga People’s Front (NPF) kümer külen, tang mezüng süa par constituency kübok Ungma, Küpza aser Sangtemla NPF unit ketdangsertem den sensaksem senden ka Honibarnü yangi Ungma yimdak menogo.
Pai tanü iba senden nung jembidang, party ana aliba ka dang küma lungjemer asünung, taruba general election-ji kecha teratatsü mali, ta ashi.
Party ana aliba ka dang akümer asünung, taoba mapang pa meyarirtemi temulung nung kecha tekidakba melii joko kibong ka amai dang pei tebilembatem; terenlok tsütsü süshia, nija nüngdaktem süshia mesüra yimden nüngdaktem süshia sadok-sadoka lemsateptsü asoshi paisa ayongzüka ashi. “Nia kü tashi agi akokba nung yariteptsü”, ta paisa shisem.
Paisa NPF aser DAN nung adenba kuli ashidang, Naga yimden tebilemtsü ya olura, anungji, “ibai yakta Naga nüburi aginüba ama telemtetba tajung ka dangi bener arutsü aser iba nungji tashi agüja nungittsü nükjidong yur NPF nung adenba lir”, ta metetdaktsü. Iba den ano “Modi sorkar aser Naga nunger lennir dak nükla tajung ngua DAN sorkar nung denogo”, ta paisa kuli agütsü.
Tarutsü mangdang aliba NPF tir Dr. Shürhozelie Leizietsu aser Nagaland Chief Minister T.R Zeliang tena lenisüba nung lungjemer maneni nungittsü asoshi paisa party worker-tem ayongzüka liasü.
Tanü iba sentong nung 26 Aonglenden Assembly Constituency nung tir, Wb. Nungsang Longkumeria mapang tatsüka agia jembidang,  taruba general election nungji 26 Aonglenden nungi tang shiba lennir (Imtikümzük) mena lir, pajisa tanaben shimshitsü asoshi maparen ajak nung nungita yariteptsü asoshi ajungshia liasü.
Kasa sentong nung NPF Mokokchung Division, general secretary & 26 Aonglenden A/C in-charge, Wb. Kilang Jamiria mapang tatsüka agidang, nisung kati kibur ana metenzüktet, anungji, tang shiba lenisüba kübok arudaki, pa denji party worker ajaki teka amteper aotsü asoshi tayongzükba ka agütsü.
Tanü iba telungjem senden nung taoba mapang congress party nung alir tenzüker aika agizüka NPF nung denogo aser parnokji NPF party temzüngi melaba ama akhümketa tenangzükba agiogo. Iba senden nung Ungma, Küpza aser Sangtemla NPF unit kübok tetsür densema tenük telen ajak nungi arua  shilem tajung agia liasü.