Taruba election nung Cong-i tanga party tem den inyaktsü: Sonia

New Delhi, Tsüklai 08 (Agencies): Gujarat Assembly election nung Congress-i menden aika anguba aser Rajasthan by-election nung Congress-i takok anguba sülen tanü Congress lenir, Sonia Gandhi-i, taruba Lok Sabha election nung BJP tamakok ngudaktsütsü atema party-i kasa tangatetba aliba party tem den külemi inyaktsü, ta metetdaktsü.
Laisa, party-i Karnataka Assembly elections nung maneni takok angutsü imlar, ta metetdaktsü.
“Taruba election nung BJP tamakok ngudaktsütsü aser India nung democracy, secular aser rongsenkettsüng shia arudaktsütsü atema Congress Parliamentary Party nung chairperson ka ama ni Congress Tir aser külem tenzükertem den külemi tanga yimtenren party tem den o lemtepba nung shilem agitsü,” ta taoba Congress party Tir, Sonia-i metetdaktsü.
Tanü New Delhi nung Congress Parliamentary Party senden nung jembidang lai Gujarat assembly election aser tawa agiba Rajasthan bye-elections dak sendakba nung, “Gujarat nung asenoki junga inyakogo aser tawa Rajasthan by election nung asenoki takok junga nguogo. Ibaji ajanga mopung melenshiba sayur,” ta metetdaktsü.
“Ni amanger, Congress tanaben shia aruba kuliji Karnataka election nunga angutsü,” ta laisa ashi.
Lar jabaso tenüng sanga lai, Rahul Gandhi kübok party asentenshi tenzükogo, ta ashi.
Laisa, la Tir inyakba mapang nung party nung inyakertem aser lenirtemi la nungita inyakba ama Rahul-a nungittsü imlar, ta ashi.
“Asenoki Congress Tir tasen ka shimogo aser asenok ajak tenüng nung ni pa atema tajungtiba bilemtsür. Tangbo paji kü dang tuluba lir. Nenoki kü den inyakba ama pa den-a kasa tejangraba tanela nung nendaka inyaktsü ta ni metet,” ta laisa ashi.
“Party asentenshitsü atema pa lenisüba kübok asenoki kanga meranga inyaktsü. Iba maparenji tenzükogo,” ta laisa ashi.
BJP-i aniba Centre sorkar aija lai, NDA sorkar yimsüsüba kübok aluyimbaren timtem nung lir, mapa manguba tebilemtsü tuluba kümdar, small & medium scale industries jenjang mejungi kümogo aser Dalits den minorities nüburtem tetsübu nung lir, ta ashi.
Laisa, “Democracy nung telemsa adokdaktsüba ya ozüng alema lir, ajisüaka sorkar tashi nung alirtemi item atemaji meinyaker,” ta aitsü.