Taruba election nungbo CCTV amshitsü

Kohima, October 24 (TYO) : Langpangkong Kaketshir Mongdang Clean Election Campaign Committee (LKMCECC)-i Chief Election Officer (CEO), Nagaland ajanga Election Commission of India nem taruba election junga agitsü asoshi inyakdaktsünüba mapa kar shia tezüluba nung tanü Mongolbar nü agütsüogo.
LKMCECC purtemi ECI nem agütsüba shidi nungji, taruba election nungbo nisung ajaki pei vote peisasa timi enoktettsüsa Voter Identity Card ya Aadhar number den sendakteptsüla aser CCTV enoka yur vote agütsü tenzükli nungi matem tashi noksa tangoka anidaktsüla ta takangba ka agüja lir.
Tanü LKMCECC purtemi Chief Election Officer ajurua jembidang, pai LKMCECC purtemi aginüba amaji taruba election nungibo polling station ajak nung CCTV enoktsü aser vote tagütsüdak nung internet ajanga noksa tangoka anidaktsüsa inyaktsü ta metetdaktsüogo.
LKMCECC purtemi Election Commission of India (ECI) nem agütsüba shidi nung ashiba agi, ECI ajanga linük ajaklen election timi agitsü asoshi tanitebelem arema nendaknendaka inyakaka, talisa Nagaland nung aser linük ajaklen küm aika election junga magitetter. Iba jagi, election agi shia nübortem tenzüktsü tangatetba jembiba aser nükjidongbo temenünütsü mapa ka dang kümadoker .
Iba amaji joko mapang talangka Nagaland nung election junga magitetba agi alima kangshidaktsüba timtem reprangteta arogo aser lokti tentettemi Nagaland ajunga nung election junga agitsü asoshi tesem ajaklen tangatetba agüja inyak tenzükogo ta LKMCECC-isa ECI nem metetdaktsü.
Mokokchung district kübok Langpangkong tzükong nung assembly constituency asem lir, itemji 21st Tuli Assembly Constituency, 22nd Arkakong Assembly Constituency aser 24th Angetyongpang constituency lir. Item constituency-tem nungji taoba küm aika election mapang ochimashi aser tashiyim mapa inyakba ngua, itemji anema nokdaktsü asoshi LKM mongdang Tuli nung 2016 küm alidang lemtet aser iba küm September 3 nungi tang tashi LKMCECC purtemi yimtsüng ajak sema oagi tangatetba agüja senzüdagi ta LKMCECC purtemisa ECI dangi züluba shidi nung shia lir.
Ajisüaka, electoral nung nisung tenüng tali aser tiyazü enokba, tangar melen vote agütsüba aser tashiyim amshiba mapatembo LKMCECC kijaibo menokdangtetsüa akok, iba jagi onok shisaboludaktsür, anungji Election Commission-i yaktasa item ochimashi aser tashiyim mapatemji nokdangtettsüsa tapet mapa inyaktsüla ta LKMCECC-i ECI nem metetdaktsüogo.
Tanü lanurtemi jangrabaji pei lima nung peisasa pei mapa agi nümadangteta linür, ibaji election timi agia government tajung ka kümtet nung dang ataloktsü anungji taruba election nungibo talisa Langpangkong nung election timi agitettsü atema Electoral Photo Identity Card (EPIC) den Aadhar sendakteptsüla aser CCTV enoktsüla ta LKMCECC-i metetdaktsüogo.
LKM-i Nagaland nung Chief Election Officer den yaritepa nübortem nem election dak aketba ozüng, teinyaktsü aser temerenshitem angatetdaktsüba shisalemsatep sentong ka yakta ayongzüka agitsü lemtetogo.