Taruba general election nung lanur nem maongka agütsütsü: Dr Shurhozelie

Dimapur, August 25 (Agencies): Taruba general elections nung NPF-i lanurtem party candidate atema shima toktepdaktsütsü aser mapang shia telok melenshirtem agientsü, ta Naga People’s Front tir aser taoba Nagaland Chief Minister, Dr Shurhozelie Liezietsu-i ashi.
Hokolbarnü Central Executive Council senden nung jembidang, Dr Shurhozelie-i “NPF ya Naga loktiliba nung tera yanga aliba telok ka lir aser mapang shia telok melenshir ket nung magütsütsü” ta ashi.
“Parnokji political tourists ama lir aser parnok ajangzüktsü aser sadoksadoka inyaktsü atema dang bilema, party melenshir. Parnoki tiyazü jembitsü kecha nungnanga mali aser asen lennirtem sen agi mesüzüktsü meranger. Iba asaya nung tashimait lennirtem kar alangogo aser iba atema sasa bilemtsür, saka züngsem teimbakati party tangatetba nung ajemdaker nokdakba angudang kanga pelar” ta Dr Shurhozelie-isa shisem.
Tanü CEC senden nung CEC züngsem 112 aden. NPF CEC züngsem ajak agi 172 lir aser iba tenüng tarensenji Election Commission of India ket nung lir. Parnok rongnung kar party nungi anenja lir aser kar CEC sendentem nung madenba atema aser party membership renew masüba atema tenüngtem züngdokogo.
NPF nungi razüka aoba teloki sorkar atsüngdoktsü tasa atong aser iba atema parnoki parnoki aginüba nisungtem menden balala nung yutsü. Parnoki Arunachal Pradesh nung atalokba ama party ajunga BJP den adentsü merang ta Dr Shurhozelie-isa tanü ashi.
Speaker tsüngdang NPF MLA 36 disqualify asütsü atema ken o tem benoka lir aser iba atema Dr Shurhozelie-i ashiba agi, parnoki taruba election nung toktepnüra, parnok tamendakdak bushitsüla.
Parnoki NPF party nung mepetmesü aser teraksa bener arutsünür, saka takok mangutsü kechiyong NPF regional party ya Naga loktiliba nung teküpokba nungi temaba jenjang tashi nung tera yanga lir, ta paisa shisem.
July 19, 2017 nü Speaker-i ashiba nungdang ajemdaker kodaser Assembly Secretariat-i TR Zeliang Whip asütsü shimba osang sangoktsü? MLA temi osang agütsüba nung ajemdaker Speaker-i TR Zeliang Whip shimbaji ozüng alema inyakba mapa ka lir, ta Dr Shurhozelie-isa metetdaktsü.