Taruba hopta India aser China na NSA senden amentsü

Beijing, New Delhi, October 29 (Agencies): India-i NSG nung züngsem akumtsü atema benokba nung China-i nokdangba aser India-i JeM tongti, Masood Azhar nokdangtsü atema UN nung benokba nung China-i nokdangba ajanga linük ana tsüngda tesentaktep mejungi aliba mapang ka nung taruba hopta India aser China na National Security Advisers (NSA) senden amentsü.
Taruba ita mezüng hopta National Security Adviser, Ajit Doval aser China National Security Advisor, Yang Jiechi na Hyderabad nung ajurutepa linük ana tesentaktep onüktem nung senden amentsü.
India-i Nuclear Suppliers Group (NSG) züngsem akumtsü atema inyakba nung China-i nokdangba dang masü saka India-i UN nem Azhar nokdangdaktsütsü benokba nunga China-i tetsükdaktsü agutsüogo.
Ano külen India-ia Pakistan-occupied Kashmir (PoK) nung US sen billion 46 indang  China-Pakistan Economic Corridor (CPEC) amenokba anema ola adoker.
India-China tesentaktep nung Pakistan-i jangjongba atema India-i tebilemtsü akar, koba ajanga tesentaktep tebenjaba kümdaktsür.
Ano külen India nung telok aikati China nungeri yangluba osettem malitsü ayongba,  tawa US Ambassador to New Delhi, Richard Verma-i Arunachal Pradesh semdangba aser Tibet yimsü lenir, Dalai Lama-i Arunachel semdangtsü atema India sorkari temelaba agütsüba atema China-i mepelar.
India ketdangser Doval aser China ketdangser Yang na ya China-India arrtsü ken o atema inyaktsü Special Representatives lir, aser mapangshia tenati China-India tesentaktep atema onük balala aika jembia arur.
Yang ya China foreign minister liasü; 2013 küm Xi Jinping Tir akümba sülen pa State Councillor inyak. China  nungbo State Councillor ya Foreign Minister dang nungi ketangsüba menden temaba lir.
Ketdangser anatisa NSG, NPT, JeM tongti Masood Azhar aser linük ana tsüngda shishilembaba onüktema kongshia jembitsü akok.