Taruba hopta nung mezüngbuba camp renemtsü

Bangkok, Jan 15 (Agencies) : Bangladesh nungi meyipa aruba Rohingya nunger Muslim aser Hindu nunger refugee-tem anenzükdaktsütsü asoshi taruba hopta nung renemtsütsü ta nangzüka aliba ama campji yanglutsüdagi, ta Myanmar nungi ketdangser tazüng kati metetdaktsüogo.
Telungpur telok kati sepaitem anema apusoba nung ajemdaker taoba August ita nungi Myanmar sepaitemi aibelenertem mita ao aser iba mapang Rohingya Muslim nunger 650,000 dak tema Bangladesh bushia jena ao.
Myanmar sepaitemibo ibaji telungpur anema inyakba dang liasü ta ashi saka iba tashiyim mapaji linük nungi Rohingya nungertem meindoktsü merangba inyakyim liasü, ta United Nations, United States aser tanga linüktemi metetdaktsüogo.
Social welfare, relief & resettlement minister, Win Myat Aye-i ashiba agi, Myanmar sorkari Bangladesh nunger tulurtem den Naypyitaw yimtiba nung senden mena Rohingya nunger kwinaka Myanmar nung aruagi lidaktsütsü aser koma tendangerang camp nung anenzükdaktsütsü, iba indangji jembiogo.
Tan taruba January 23 nungi iba maparenji tenzüktsü sentong renema lir, ta angazüker.
“Taruba hopta nungi Myanmar limai meyipa arurtemji agizüktettsü asoshi sentong yangludagi aser ibaji mapang shidak nung tembangtsü imlar,” ta Win Myat Aye-isa metetdaktsü.
Japan foreign minister-i taoba hopta nung Myanmar lima semdangba mapang refugee-temji anepalua meyipa arudaktsütsü asoshi Suu Kyi-i aniba sorkar dang ajungshia shiogo.
Acre 124 telungzük Hla Po Khaung camp kübok ki 625 nungji nisung 30,000 shi anenzüktettsü aser tan ita tatem tashi nungbosa ki 100 renemtsü, ta sorkar osang ajanga metetdaktsüogo.