Taruba hopta RS nung GST bill benoka jembitsü

New Delhi, July 29 (Agencies): Taruba hopta Rajya Sabha nung GST Bill benoktsü atema Hokolbarnü sorkari renema yuogo.
August mezüngnü nungi Rajya Sabha nung sorkar business senden dak sentakba nung Minister of state for Parliamentary Affairs, Mukhtar Abbas Naqvi-i sangdong ka ajanga, Constitution (122nd Amendment) Bill, 2014 agizüktsü atema benoka jembitsü, ta metetdaktsü.
July 27, 2016 nü Cabinet-i iba Bill nung ozüng kar yanglushia, manufacture tax 1% agienogo aser GST Bill mapa küma benokba sülen mezüngbuba küm pongu nung state temi saru nung takoksa ngura Centre-i senotsü teyari agütsütsü renemogo.
Tan mongpu Parliament senden ya August 12 nü tembangtsü aser iba senden nung sorkari GST Bill agizükner.
Iba Bill ya Lok Sabha nungbo yaküm May ita agizük, saka sorkar nübo peria maliba den külemi opposition, Congress-i iba bill nung temelenshi kar benokba ajanga Rajya Sabha nungbo magizükteti lir.
Rajya Sabha nung iba Bill agizükra maneni iba bill nung melenshiba ozüngtem agizüktsü atema tanaben Lok Sabha nung benoktsü.
GST Bill ya indirect tax regime ajanga linük nung state 29 prong market ka dang akumtsü atema lir. Iba ya taküm April ita nungi mapa küma benoktsü sentong liasü, ajisüaka Rajya Sabha nung Congress-i sashia anema nokdakba ajanga iba bill magizüktet.