Taruba ita ana tsüngda OROP atema inyaktsü: Manohar Parrikar

Budgami (Jammu & Kashmir), November 03 (Agencies): Brihostibarnü Union Defence Minister, Manohar Parrikar-i, ex-servicemen lakh kati dang One Rank One Pension scheme angutsü timtem ajurua lir, ajisüaka iba atemaji ita ana tsüngda inyaktsü, ta metetdaktsü.
Tanü Jammu & Kashmir, Budgami nung army nung anisüngzüka alirtem den jembidang Defence minister-i, “Ex-servicemen lakh kati dang (Lakh 20 nungi) OROP scheme nung aliba ama pension mangur aser ibaji technical timtem mesüra kulikaket dak sentakba timtem balala ajanga lir. Taruba ita ana tsüngda onoki item timtem atema inyaktsü,” ta metetdaktsü.
Defence Minister aser Army tongti, General Dalbir Singh na Param Vir Chakra award mezüng angusang, asür Major Somnath Sharma aser 1947 küm Pakistan nunger dang nungi Srinagar Airport kümzüktsü merangdang asür sepaitem nem akhüm agütsütsü atema yagi arua liasü.
Parrikar-i ashiba agi, sorkari OROP atema nendaka inyaker, kechiyong tesüiba küm 43 nung iba atema meinyaki liasü.
“Onoki ibaji inyakogo. Kümshia sen crore 7,500 crore intoktsü aser arrears atema sen crore 11,000 agütsüogo. Pension sen shilem 23 nungi shilem 24 tutsüogo,” ta paisa ashi.
Ex-servicemen tebilemtsü onük balala angadangba sülen pai, “Tanü koba tebilemtsü onüktemsa kü dang shiogo, ibaji ni ano tanaben arudangbo inyaker alitsü. Nenok den jembitsü atema kü nem minute 10 dang lemzüktsü saka ni minute 40 atsülanga jembiogo. Taruba nungbo ni nenok den anogo tesadang ka mapang intoktsü,” ta ashi.