Taruba ita Musharraf Pak limai meyipa arutsü

Islamabad, Metsüremi 24 (Agencies) : Pakistan nunger taoba lenir, General (retd) Pervez Musharraf, shiba aibelenba maparen tulu ka atema special Pakistani court matsüngdang nokdaktsü jaoka lir, pa taruba ita nungji United Arab Emirates (UAE) nungi meyipa arutsü, ta Pakistan Awami Ittehad lenir kati metetdaktsüogo.
Temang anepalutsü atemer mepishiba ama Pakistan toktsür aotsü asoshi pa nem temelaba agütsüba sülen taoba küm nungi arishi küm 74 tain Musharraf ya Dubai nung lidagi.
Linük nung emergency ozüng agütsüba sülen superior court nung obendanger aika tepuokdak mesüka pei ki adena modaktsüi nokdanga ayuba aser obendanger 100 dak tema mapa nungi anentsüba amala aibelenba maparen nung ajemdaker taoba sepai tanishir ya 2014 küm March ita nung aitsüogo.
Ozüng anema sorkar ajemshia inyakba aser Benazir Bhutto tepsetba ken o amala nung ajemdaker pai ozüng anema inyak ta tejangja sangdongogo.
“Taoba Pakistan Tir aser (retd) General, Pervez Musharraf taruba ita nungji Pakistan limai meyipa arutsü,” ta yimten aser tamangba yimsü nung ajemdaker tentetba telok metsür asem longjemer akümba Pakistan Awami Ittehad (PAI) nung secretary general, Iqbal Dar-i metetdaktsü.
Paisa ashiba agi, Musharraf’ koba anogo nung arutsü mesüra koba yimti nung aruagi anentsü, ibaji PAI nung züngsem ajak den angatetteper külen metetdaktsütsü.
Musharraf shibai 1999 nungi 2008 tashi Pakistan yimsü süa aru, pai pa taküm kümzüka mali ta shia sorkar dang tanüker teperi agütsütsü atema mepishia asüngdangogo aser iba nungji ajemdaker pa indang okatsüria interior ministry nem tezüluba nung agüja lir.