Taruba küm 5 tsüngda temelenshi bener arutsü: Neiphiu Rio

Council Hall, Mon nung Konyak Gazette Officers’ Union indang 27 buba sentong nung Chief Minister Neiphiu Rio den ketdangsertem külemi agiba noksa angur. 

Mon, Rongchii (April) 6 (TYO): Sorkari nübortem tenzüktsü aser taruba küm pungu tsüngda wadang pungu- infrastructure, sports arena, tourism, agri aser allied sectors nung temelenshi bener arutsü ta Chief Minister, Neiphiu Rio-i tanü ashi.
Council Hall, Mon nung Konyak Gazette Officers’ Union indang 27 buba sentong nung Rio-i Aoleang salem-a metetdaktsü aser paisa taküm Tsüklai (February) 13 nü Mon jila nug NDPP-BJP teloktep indang election nüboyimba sentong mezüng tenzük ta ashi.
“PDA sorkar akümba sülen tang mezüng atema Mon nung tongti tesemdanger ka ama shilem agiba atema kanga pelar. Iba kasa tesem nungi NDPP aser BJP indang election nüboyimba maparen tenzük aser Tsüngrem taochi aser nenok teyari ajanga onoki sorkar ketdangsütsü maongka angu. Asenoki maneni nübortem tenzüktsü atema asenok tesentaktep meraksatsü imlar” ta paisa ashi.
Küm 27 tashi KGOU-i Konyak nunger len ania aser shisatsü agüja aruba atema Rio-i parnok nem tenüngsang agütsü.
KGOU ya Konyak Union, KNSK, Konyak Students Union aser Arogo dena tanga teloktenji aika den teyariteper tajung ka lir. Nü tarutsü tajung yanglutsü atema nenoki shilem agia arur aser iba atema nenok nem tenüngsang agütsür, ta Nagaland chief minister-isa shisem.
Mon nung azüngtsü-zülutsü jenjang mejungi aliba atema Rio-isa KGOU dang district nung iba jenjang ajungkettsü atema mapa inyaktsü ayongzük.
Paisa Mon Deputy Commissioner, Thavaseelan K, IAS-i meimchir yariba mapa inyakba atema tenüngsang agütsü.
Thavaseelan ketdangsüba kübok Mon district nung mapa lemzüka aliba NCS/NPS/IAS/IPS ketdangsertemi civil service jangrartem nem angati class agir.
Shankar IAS Academy, Chennai-i ayongzükba Mock tests nung Mon nungi lanurtemia shilem agitsü tenüng agütsüba atema kanga pelar. Tanüngba district nung alirtemi iba mapa ajizüka inyaktsü imlar, ta Neiphiu Rio-isa ashi.
Wangkhao Government College nung Science wing lapoktsü atema Rio-i sendaktepa alir ajaki district nung kaketshirtem ajangzükdaktsütsü atema iba mapa inyaktsü ayongzük.
PDA sorkari tongti süa inyaktsüba sentong kar lemsatepdang Rio-i Tourism ajungkettsü atema mapa inyaktsü aser iba ajanga rongsenkettsüng ajungketba den mapa adoktsü ta ashi.
Hornbill Festival ya alima ajungai metetba benjung ka lir aser iba jagi sorkari district ajak nung Mini Hornbill Festival tem ayongzüka agitsü lemtetogo. Hornbill Festival nung sen crore 4-5 shi ka endoker saka meyiper sen crore 51 shi ka bendenteter. Anungji, sorkari operators, tourist guides aser agents nem training agütsütsü, ta chief minister-isa metetdaktsü.
Iba dak sendakba nung sorkari Mon aser tanga Eastern Nagaland district tem nung Convention centre aser tourist guest house tem yanglutsü lemtetogo.
Sorkarisa Assam majangi Mon tashi Foothill Road (Express Road) den Tizit tashi train lenmang yanglutsü aser item ajak ya asangsang nung ataloktsü imlar. Anungji nenoki terenlok aginüra, sorkar den yariteptsüla aser mapatong balala inyaktsü atema ali agütsütsüla, ta Rio-isa ashi.
Iba sentong nung Mon DC Thavaseelan K, IAS-ia o jembidang, district administration-i tongtipang sector tenet- sectors – health, education, agriculture, livelihood & employment generation, water & sanitation, infrastructure (telecom, power & roads) aser tetsür, tanur, lanur, balaka sotetertem, taintem, PLHIVs, Drug & Opium addicts nungertem atema financial inclusion lir, ta metetdaktsü.
Sentong nungsa taoba minister MC Konyak (mezüngbuba KGOU general secretary) aser Konyak Union President Manlip Konyak natia o jembi.
Iba sentong nung Minister Metsubo Jamir, Minister Paiwang Konyak, Advisor Noke Wangnao, Advisor Pohwang Konyak aser Advisor Khehovi Yepthomi nungertem den sorkar ketdangser aser tongtipang nisung aika aden.