Taruba küm 50 tsüngda India nunger oshitem tesadang ka shibo samatsü

New Delhi, August 04 (Agencies): India nunger nütsüng billion 1.3-i jembiba oshitem tesadang kabo küm 50 tsüngda samadoktsü, anungji linük nung tribal nisungtemi jembiba oshitem ya wazüka ayutsü nüngdaker, ta mongintemi metetdaktsü.
People’s Linguistic Survey of India (PSLI)-i linük nung oshitem volume survey 50 nungi tang tasentiba volume 11 sayaba sentong nung parnoki iba osang metetdaktsü.
India nungeri oshi 780 shi jembir, ta PSLI-i metetdaktsü.
“Taruba küm 50 tsüngda India nunger oshi tajemba agi 400 bo samatsüsa lir,” ta PSLI Chairman, G.N. Devy-i ashi.
“Oshi ka samaba shia iba sobalibaji tepseter. Taoba küm 50 tsüngda oshi 250 samaogo,” ta Devy-isa metetdaktsü.
PSLI nung shisashirtem aser tesayurtemi sobaliba wazüka ayutsü atema Indian regional oshitem document asür.
“Bihar anüdoklen jembiba oshi, Maithili ya küm 1,000 shi tain lir. Iba denji kasa oshi tejen aika India nung tang tashi taküm lir, ajisüaka itemji junga wazüka meyuteter,” ta political psychologist, Ashis Nandy-i ashi.
Devy-i ashiba agi, PSLI-i alima nung oshi 6,000 shi document asütsü atema project ka tenzüktsü aser iba osangji 2025 tashi nungbo sangdongtsü.