Taruba nungibo election ajak nung VVPATs amshitsü: EC

New Delhi, May 12, 2017: Hokolbarnü New Delhi nung Election Commission-i party ajak nungi züngsemtem ayongba senden nung Chief Election Commissioner, Nasim Zaidi den Election Commissioner ana- A K Joti aser OP Rawat nungeri anir senden amenba abelen noksa nung angur. Ajichilen noksa nung EVMs aser VVPAT amshia sayuba noksa nung angur. 

New Delhi, May 12 (Agencies): Election ajak nung Voter Verifiable Paper Audit Trail (VVPAT) keta aliba Electronic Voting Machines (EVMs) amshitsü atema takhangba agütsüba agizüka tanü Election Commission of India (ECI)-i, item oset alitsü atema senotsü nguogo, aser 2019 General Elections tashi nungbo item machine amshitsü, ta metetdaktsü.
Osang angazükba agi, Election Commission-i taküm August ita nungi sangküm September ita tashi nung VVPATs ajak angutsü.
Election Commission-isa, 2019 küm Lok Sabha election nunga VVPAT amshitsü, ta metetdaktsü.
Tanü Election Commission-i EVMs onük nung party ajak nungi züngsemtem ayonga senden ka amen.
Election Commission-i National party tenet aser state yimtenren party 48 nung Tirtem nem EVMs aser VVPAT indang temetettsü ka agütsüogo.
Taoba ita opposition party 16-i Election Commission dang akhidang ama paper ballot amshitsüla, kechiyong EVMs nung tamang mekateter, ta shia liasü.
Ajisüaka Election Commission-ibo, EVM ji raksaa amshitettsü makok, ta ashi.
Election Commission-i taruba nungibo election ajak nung EVMs nung VVPAT units keta amshitsü aser election maparen nung nüburtemi tamang katettsü, ta ashi.
Election Commission-i mepishiba nung ajemdaker Union Cabinet-i VVPATs lakh 16 alitsü atema sen crore 3,200 jungnüa lemzüktsüogo.
Mongolbarnü Delhi Assembly election nung Aam Aadmi Party (AAP)-i EVMs koma raksaa amshitettsü, ibaji sayua liasü.
Ibaji anema Election Commission-i, AAP-i raksaa amshia sayuba machine ji EVM mesüka lir, aser ibaji raksaa amshitettsüsa yanglu, ta ashi.
Delhi Assembly nung AAP MLA, Saurabh Bharadwaj-i EVM nungji party balala shia nem vote anana agütsü, ajisüaka vote azüngdangbo vote karbo tanga party dangi oor liasü.

Onoki mepishiba EC-i magizük: AAP
Tanü Election Commission-i party ajak nungi züngsemtem ayongba senden nung AAP nungia Delhi Deputy Chief Minister, Manish Sisodia aser AAP MLA Saurabh Bhardwaj na dena liasü.
EVM onük nungbo opposition lenir party ji AAP lir, aser parnoki, AAP-i ‘EVM hackathon’ ayongzükang ta onoki mepishiogo, ajisüaka EC-i magizük, ta aitsü.
Sisodia-i twitter ajanga, hackathon ayongtsü atema mepishiba Election Commission-i magizük, ta metetdaktsü.
Tesüiba election mapang nung amshiba EVM tem raksaa amshiogo, ta kuli sayutsü atema Election Commission dang item EVM ji meshi, saka parnoki magütsü, ta paisa ashi.
Tanü iba senden tagidak mapang kima osangbenertem den jembidang AAP MLA, Saurabh Bhardwaj-i, iba senden nung onük tasen kecha mejembir, ta ashi.
Paisa, “Parnoki parnok meyong EVM ji onok nem magütsür, ajisüaka EVM raksaa amshia sayutsü atema parnoki jazüker. Election Commission ya kanga tesangra,” ta ashi.
Ano külen senden nung CPI national secretary, Atul Anjan-ia, “Kechiba anüdoklen aliba terenlok linüktemi EVMs mamshir?” ta asüngdanga liasü.
Yashia AAP-i Election Commission dang, tawa agiba assembly election tem nung EVM raksaa amshir asü mamshi’ar ibaji jangjatsü atema Election Commission kübok party ajak nungi züngsemtemi akumba committee ka tentettsü, atema takhangba agüja liasü.