Taruba Parliament nung Ram temple Bill benoktsü: BJP MP

Nallia (Uttar Pradesh), Yimpoksüi/November 23 (Agencies): Tanü BJP MP, Ravindra Kushwaha-i, Ayodhya nung Ram tekülem ki yanglutsü atema temelaba ka angutsü atema taruba Parliament nung Bill ka benoktsü, aser iba Bill ji Rajya Sabha nung magizüktetra Centre-i ozüng ka benoktsü, ta metetdaktsü.
Ayodhya li mangatettep ken o ya tang Supreme Court nung benoka lir, ajisüaka Hindutva tekoktemi yangji Ram tekülem ki yanglutsü atema ozüng ka benoktsü akhangba mapang ka nung BJP leniri iba osang ya metetdaktsüogo.
Nallia nung osangbenertem den jembidang Salempur nungi BJP MP-i, Kushwaha-i, “December 11 nungi tenzüka taruba Parliament senden alidang Ram tekülem ki yanglutsü atema Bill ka benoktsü,” ta metetdaktsü.
“Ajisüaka iba Bill ji Rajya Sabha nung magizüktetra iba atemaji ozüng ka benoktsü,” ta Kushwaha-isa metetdaktsü
Pai ashiba agi, Parliament nung iba Bill benoka o lemtepba mapang nungang koba party-i Ram tekülem ki yangluner aser koba party temisa ibaji anemerar jangjatsü.
BJP MP-i, iba Bill ya Lok Sabha nungbo agizüktettsü, ajisüaka Rajya Sabha nungbo agizüktettsü asü magizüktsüar mejangja, kechiyong yangji Bharatiya Janata Party züngsem peria mali, ta ashi.
Supreme Court-i Ayodhya li mangatettep ken o ya sangküm January ita nung ang angadangtsü, ta sangdongogo.
Amongnü Vishwa Hindu Parishad-i Ayodhya nung `Dharma Sabha’ sentong ayongzüka aliba mapang ka nung Kushwaha-i iba o ya jembiogo.