Taruba Republic Day !

India ya temzüng ka kübok senso ajak kasasa temeten ngua pei jembinütsü jembitsü aser pei amangnütsü amanga telongjem ka kübok sademsadema alitsü asoshi 1950 küm January 26 nü linük temzüng latetba sülen taküm 2016 küm 67 buba “Republic Day” yashi mongogo. 1950 kümji Naga nungerbo India telongjem nung madentsü telemtetba agir liasü. Ajisüaka, timtem reshikangshi marem Naga nunger lenirtemi Naga nungertema India telongjem kübok alitsü lemtetba agi tanübo Nagaland, Manipur, Arunachal Pradesh aser Assam nung alir Naga nungertem India kübok liadokogo. Iba jagi 1950 küm India nung madentsü ta nokdakertemi tanübo India Nissan  atsüketa aküm agütsür aser India temzüng ozüng latettertem nem tenüngsang agüja linük anogomong amonger. India temzüng latetter taoba küm 66 tsüngda Naga nunger yimten aser loktiliba nung temelenshi tulukaji aji asütsü. Ajisüaka, iba jagi Naga yimten tebilemtsü anen masü saka tamajungba-ang ka küma orr tanübo ano Naga yimten tebilemtsü latettsü asoshi ajaki kanga khuretsa jembiteper. Atangji, linük anogo ‘Republic Day’ ama nung nübortem asoshi sorkari inyaktetba aser inyaktsü bilema alibatem  jembitsü nüngdaker, anungji jembir. Ajisüaka, temzüng latetba anogo, Republic Day ama ka nungbo linük nung terenlok mapa inyakbatem indang jembiba dang nungibo temzüng ozüng shitak amshir asü mamshir ta jembiba tapetba süla.  Aji oda, temzüng latetba indang jembidang, India ya temzüng ka kübok senso ajak kasasa temeten lia yimten nung shilem agitsü, anungji democratic sorkar asütsü, pei jembinütsü jembitsü, anungji sorkari tai inyakba anema tai aputsü akoktsü aser pei amangnütsü amangtsü, anungji India ya Hindu lima  dangbo masütsü. Iba tangatetba nung küm 66 tashi India nung kin kidong aser tamangba yimsü ajak sademsadema pei linüdak alir, pei linütsü alir aser pei amangnüba amanger ta senso ka madak kecha talenba ka melii sademsadema alir. Ibaji senso ka asoshi nüjiso anguba aser nüjiso akaba yimya lir. Ajisüaka, tanü tensa yamaji mesüi tesem tesem  nung kasa sensosanger süaka pei amangnütsü mamangdaktsüba tashiyim agi inyakba mapatem angur. Ano, tanübo India nung nashi shi achirtembo nashishi achi nung temerenshi tulu angutsüsa chiyongtsü achiba tashi nung talenba ozüng latetogo. Ibaji jungjunga bilemdangra, küm 66 jakdang linük nung temzüng yanglurtemi India nung kin kidong aser tamangba yimsü balala amangertem  ajak kasasa senso tashi aser temeten amer sademsadema alitsü latetba  mangdang aser tangatetba anema inyaker ta angatettsü. Ibayongji, India tir Pranab Mukherjeei linük nung sensosangertem rongnung  kati ka den aremzüktepa aser akümtsübutepa alitsü asoshi tayongzükba agütsüpet agütsüba angashir.Iba denji ano Naga nunger ama, India temzüng latetter küm 60 dak tema aruakasa, India temzüng kübok melinüba kin ali tashi India nung küm shia Republic day amongbaji tesüsaba takok ngur amongba anogomong kabo masütsü.  Aji oda, India temzüng latetter küm 67 buba tashi monga aruakasa, tang tashi Naga yimten temeten aser tebilemtsü melatettet arubaji India asoshia tamakok ka ama bilema temulung agüja inyaktsü nüngdaker. Naga yimten tebilemtsü melatet tashi Jai Hind shiaka aser Kuknalim shiaka, Naga limabo nüchi makümba lima ama anak auyi agi asüngtsü. Joko, Naga yimten tebilemtsü ya election mapang jembiba ken o ka dangbo masütsüla. Naga nunger tejakleni onüseta moudaktsü nokdangba tenokdangbaji Naga yimten tebilemtsü ya lir. Naga yimten tebilemtsü akoktsü indang jembia yimten telok kati election nung takok ngur sorkar akümbaji takok masü saka tebilemtsü bendenloker aser telatetba arutsü lenmang talangba akümer ta angatetdi. Aji oda, taruba ‘Republic Day’ nungbo Naga nunger linük tenzükertem o India sorkar na yimjung yangluba otsü masü aser yimten ken o jembitsü tamendakdak ken o renemba otsüa masü saka Naga yimten tebilemtsü mali küma inyaktetba takok ken atentsü imlaa atadi.