Taruba sorkarji NDPP-i anir akümtsü: Alemtemshi Jamir

Mokokchung, Tsüklai 20 (TYO): 25 Mongoya Assembly Constituency nungi Nationalist Democratic Progressive Party (NDPP) candidate, Alemtemshi Jamir (Rtd. IAS)-i Sangtennü (Mongulbarnü) Meyilong, Moalenden, Chubayimküm aser Longsa yimtem nung pa election-i aitsü sangdongba sentong agia jajaogo.
Tanü pai item yim balala sema jajadang, taoba Nagaland Chief Minister Nephiu Rio-i aniba mapang DAN sorkar nung melangmepu kecha madoki kanga junga yimsü süa aru, saka kodang pai CM menden toktsü, aji sürbo asen lima makmakshishi adoka küm pezü tashi sorkar junga bener mouteti aruogo aser aji nüburtemi meteta lir, ta ashi.
Joko nüburtemi NPF party dak tamang mekateti kümer iba sorkar ya kodang melentsü ta nübur nangnungba ola angashia party tasen NDPP ya tentetba lir, ta paisa ashi.
Anungji, NDPP-i aniba sorkar arur külen yimsüsüba tajung ka tentettsü, ochi shia yimsü asütsü aser temzüng kübok akhümtsübua yimsü asütsü aser asen lima temelenshi bener arutsü aser ibaji o agi masü saka mapa agi sayutsü, ta paisa metetdaktsü.
Taruba sorkarji NDPP-i anir akümtsü ta kuli ka ashidang, BJP ya taoba mapang NPF den alliance liasü, aji saka, tang yabo NDPP jenjang tajungba aser tashi taitba ngua parnoki NDPP den dang pre-poll alliance yangluba lir, ta pai nüburtem meratatsü asoshi o ka metetdaktsü.
DAN sorkar mapang pa dang ‘Vision 2030’ kaket zülutsü asoshi asüngdangba ama züluogo, saka iba kaketji parnoki mazünger aser yangji keta alibatemji meinyaker, anungji, NDPP-i aniba sorkar arur külen iba kaket nung Naga nunger asoshi mangdang kechisa renema lir, itemji inyaka aotsü, ta paisa ashi.
NDPP nisan sentsüji temesüng aser temerem lir. Temesüngji yimjiyimjung temaitsü lir aser temeremji pei lima asoshi taküm bendanga agütsüba/azü tenlaa inyakba temaitsü lir, ta pai rateta ashi. Nisan nung alima (globe) noksa inokba tetezü alima rangben nungi shisatsü bendena, medemdanga aser lirumedema pei atep nung terenlok mapa balala inyaktsüba (think globally act locally) temaitsü lir, ta paisa shisem.