Taruba UN lenisang menden atema Guterres tenüng benoker: UNSC

United Nations, October 07 (Agencies): Ban Ki-moon melenzüka, taruba United Nations (UN) Secretary General menden bendaktsütsü atema United Nations Security Council (UNSC) züngsemtemi tesüiba Portugal Ato Kilonser, Antonio Guterres tenüng benokogo.
2005 küm June ita nungi tenzüka, 2015 küm December ita tashi UN High Commissioner for Refugees (UNHCR) inyakdang arishi küm 67 tain Guterres-i pei linük toktsür bendang linük balala nung jenoka alir migrant nisungtem indang temeten atema bendanga agüja inyak.
“Turkey aser Jordan amala kidangsüa aliba linüktem nem nungdakba teyari magütsüra, Syria, Iraq, Afghanistan aser iba amala timtem toushi jenti ajuruba linük nüburtemi tarutsü mapang Europe nung jenoka alitsü merangtsü,” ta Guterres-i taoba mapang tekümdangtsü osang alima dang metetdakja aru.
Pai UNHCR menden abendang, par tentet telung nung temelenshi tajung jenti bener arutsüba osanga bushiteta lir.
“Ni UN lenisang menden asangsang nung abentsü maongka ngura, tongpang raraba, kiralongraba aser iba amala lendongtsüdong balala ajuruba ajanga takoksa angur nisungtem tenzüka yaritsü nangzüker,” ta Guterres-i UN lenisang menden bendaktsütsü atema pa tenüng benokba osang angazükba sülen metetdaktsü.
Portugal yimtiba, Lisbon nung 1949 küm April ita 30 nü asosang, Guterres-i Portugal yimtenren sabang nung tetsüng ajemoka, 1974 küm tentetba Socialist Party yimtenren telok nung züngsemba sülen 1976 küm mezüngsüa agiba democracy yimsüsü yimya election nung takok ngua, pa Portugal yimsüsür ka aküm.
Portuguese dak alaka, English, French aser Spanish oshi jembitetsang, Guterres-i 1992 küm opposition telok nung densemba Socialist yimtenren telok secretary akümba sülen pa lenisüba kübok par Socialist teloki 1995 küm agiba general election nung takok ngua, pai Portugal Ato Kilonser menden abentsü maongka ngua liasü.
Guterres lenisüba kübok par Portugal-i melentepa abenba European Union (EU) Tir menden 2000 küm tetenzüklen takok ngua abenba osanga bushiteta lir.
Iba mapang, par Lisbon-i mezüngbuba EU-Africa summit senden ayonga amenba den 2010 küm tashi nung EU jenjang kanga agi tajungba kümdaktsütsü mapatong, Lisbon Agenda-a European Commission-i takok ngua agi.