Tarun Gogoi-i Citizenship Bill anema longjemtsü ayongzük

Guwahati, September 10 (Agencies): Centre-i Citizenship (Amendment) Bill (CAB) benoktsü ta asüba anema Assam nungertem longjemtsüla ta taoba Assam Chief Minister aser Congress lennir tejen Tarun Gogoi-i ashi.
“Citizenship Amendment Bill(CAB) ya ozüng ka ama meyangludaktsütsü atema Assamese nunger adianu ajak longjemtsü ni ayongzüker” ta Gogoi-i ashi.
Union Minister Amit Shah-i CAB tanaben bener arutsü ta ashiba sülen Gogoi-i iba tayongzükba agütsü.
Guwahati nung NEDA indang 4 buba Conclave nung jembidang Amit Shah-i “Centre-i CAB tanaben bener arutsü aser iba ajanga Arrla 371 nung lateta aliba ama Northeast nunger temeten nung mekongshitsü” ta metetdaktsü.
Chief Minister Sarbananda Sonowal aser NEDA convenor Himanta Biswa Sarma nati CAB anema menokdakba atema Tarun Gogoi-i tena aitsü.
Tenati Assam nung lisopurtem indang temeten kümzüka ayutsü atema meinyaker, ta paisa shisem.
Gogoi-isa Meghalaya, Nagaland aser Mizoram nungi arurtemi CAB anema tebilembatem metetdaktsüba atema tenüngsang agütsü.
State Agriculture Minister aser Asom Gana Parishad(AGP) president Atul Bora-ia iba senden nung CAB dak sendakba olen kecha mejembi aser iba atema Gogoi-i pa-a aitsü.
Minister Bora-i state dak sendakba onük asoshi ola madokbaji tesasatsüka lir, ta pai ashi.
Gogoi-isa National Register of Citizens (NRC) maparen inyakba aitsü aser final list ji amajok lir ta shisem.
Tawa tu Tarun Gogoi-i Chief Justice of India, Ranjan Gogoi dangi shidi ka züluba nung NRC maparen inyakba nung temulung masüba shiogo.