Tarutsü alimaji ne senti vote jagi lemtettsü

Mokokchung, Tsüklai 23 (TYO): Tang ya 13 buba Nagaland Legislative Assembly election asoshi yimden telok balala pei meden kanga dang mazüngi inyaktepba mapang ka lir. Joko asenok dangi polling anogo anasaba aruogo. Polling-ji Tsüklai (Feb) 27 Sangtennü agitsü asoshi Election commission of India (ECI)-i anogo latetja lir.
Mezüng election inürtem tenüng meshiba mapangbo Mokokchung district kübok parnok 48-i tenüng agütsü, aji saka, item rongnung parnok 34-i dang tang aruya aliba election nungji candidate ka ama tokteptsü. Tazüngtsübo parnok 35 züngteter saka nisung kati constituency ana nungi tokteper asünung, parnok 34 dang alitsü.
Mokokchung district kübok Naga People’s Front (NPF)-i dang Assembly Constituency ajak nung tokteptsü, tanabuba nung Nationalist Democratic Progressive Party (NDPP)-i constituency ti (8) nung tokteptsü, National People’s Party (NPP)-i constituency 4 nung tokteptsü, Bharatiya Janata Party (BJP) – Indian National Congress (INC) – Nationalist Congress Party (NCP) aser Janata Dal (United) nungertemi constituency ana-na nung tokteptsü, Lok Janshakti Party (LJP) nungi kati aser Independent nungi parnok pezü (4)-i tokteptsü.
Mokokchung district nung ya polling station ajak agi 226 lir, item rongnung polling station 66 nungbo CCTV amshitsü aser tanüngba network junga maliba tesemtem nung videograph asütsü, ta osang ajanga angazüker. Mokokchung district nung election agiba reprangtsü atema general observer IAS officer parnok asem tashi arua lir, police observer ka (1) aser expenditure observer IRS asem (3) arua lir. Anungji, tangba election yabo taoba mapang dang nungi tera balaka asütsü, ta nüburtemi jembir.
Tang tashi nung Tuli A/C aser Koridang A/C nung tensa tia tera majungba dak alaka tanga constituency nungbo osang tamajung atalokba kecha mangashir. Tensa tia azüoktsü atema Mokokchung district atema central reserve paramilitary force (CRPF) company 31 yoka lir, anungji, tensa tiaji tamajungba maotsü südi ta nüburtemi imlar aser iba asoshi sorkar bangdakia akokba tashi meranga inyakba angur.
“Clean Election” yimyim yagi kibong aika nung kongshiba osang angashir, yimtsüng aser town nung kibong aika nung clean election nisan songa angur. Anungji clean election yimyim ya amajokbo masü saka telangzüba lir amai ajiteter. Iba maparen ya tenzüker tatsüka dang asünung, tarutsü nungbo tajungba aotsü imlar.
Aji saka, ano tip külen reprangdangra, election temenen-jibo ano lir. Tongtibangsa candidate-temi sen amshiba aser voters-temi candidate dang sen akhangba otsü angazüker. Tesem aika nung nüburtemi election aiba nükjidong (manifesto) masü saka sen ang angatetba otsü angashir.
Osang tajung kaji, taoba küm ishika jakdang Nagaland nung osang kaket adoker yimozülurtemi democracy dak mapetba osang kecha madoktsütsü renemba jagi taküm balaka election dak sendakba osang aika sota liasü. Iba dangji ano ECI-ia Election inyakyim dak ajemdaker osang kaket ajak kanga junga mita arudaki. Taoba election nungbo yimtsüng balalai pei senso candidate shimba mesüra telok balalai candidate ka pusema osang kakettem sünga adoka liasü, saka taküm ibaji kanga ajemogo aser ibaji temelenshi rongnung ka asütsü ta ajiteter.
Joko mapang kopi melii asen jakdang constituency ajak nung pei lenir shimtsü anogo tonga arudar. Polling anogoji matongdang aser ne vote-ji majendang nai khen kanga junga shisadangang, kechiyong ne vote jagi tarutsü asen lima tiaji yanglutsüba lir.
India temzüng kübok nisung ka nem tashi tulutibaji vote ajentsü temeden agütsüba ya asütsü, anungji, nüburtem ajaki mangdang akaba lenir tajung shimtsü tang ya mapang tajung lir ta angateta ajaki election nung ochi shia shilem agitsü junger.
Mokokchung district kübok A/C ter (10) lir, item nungji candidate-tem, yim aser telok tenüng yangi agütsür;