Tarütsü aser song agi machidak rongsen rizüngdi

~ L. Kika Pongener.

Mathi-6:19. ” Nenoki pei asoshi ali nung rongsen terizüng, kechi nung tarütsü aser song agi chimar, aser aoueri rakpoker aser aouyar. Nenoki pei asoshi kotak nung rongsen rizüngang, kechi nung tarütsü aser song agi machir aser aueri merakpoker aser mauyar “. Rongsen ya kechi ta Dictionary lapoka mereprangyong-jia, tanü asen context nung tongmelang agi rajemtsü atema, alu-kimong, lim, yokya-sonü, ki-o-jen, sen, tsük, gari, hon-taribi kiset-shiruru etc. aser taküm nung rongdak nüngdakba osettsüset-tem, aben-süoshi aser chiyungtsü, item ajunga dangji tongmelang agi rongsen ta ajatsü akok. Shirnok ket nung tang shiyunga aruba rongsen-tem, pei asoshi peria yur kulena ano tangar-a yaritettsüsa peria aka, aser tarutsü putu atema-a, oda putu ishikabo chiyunga-jema, kaa-ita peria litettsüsa rizünga aka, parnok dangji ‘TAKAR’ ta ajar.
Otsüla oboula nunger mapang tanü amai sen, hon-taribi, gari etc. yamala senti-rongsen-tem ya maka asü, saka par putu mapang nung shirnok ket nung alu-kimong, lim, yokya-sonü, kiset-shiruru, tsük-jen sunga tok-oka aka, parnok dangji ‘TAKAR’ ta aja. Ajiser, item takartem jagi Tsüngremi par nem moatsüba rongsenji par asoshi tang masü, saka nübur asoshi moatsü, ta tangatetba nung mapang shia kika-süchi, yimpoksü aguja, yimer-yimsanger nem shijok-tuja, kilen ayua shijok lema agüja, benjong ayongzüka peria chiyunga – jemdaktsü. Anungji Tsüngremi parnok nem ano tali tali-ang moatsü. Aji oda, shirnoki par nem moatsüba rongsen agi nübur den lemsatep, item takartem rongsenji kodanga merosep. Yisu-i nenoki pei asoshi alima nung masü, saka kotak nung rongsen rizüng-ang ta ashi. Kechiyong alima nung rizüngra tarütsü aser song agi chimatsü aser aouer-i rakpoktsü aser aouyatsü. Saka kotak nung rizüngra tarütsü aser song agi machitsü aser aouer-ia merakpoktsü aser maouyatsü.
Asenoki tongmelang, tangatetba temesu agi khen shisadangra, kodaser alima nung taküm lia, ano kotaki matu sernung, kotak nung tua rongsen rizüngtsü akoktsü ??? …ta sungmanga bilemtsü akok. Ano Yisu-i alima nung rongsen rizüngra taruütsü aser song agi chimatsü aser aouer-i rapoktsü aser aouyatsü ta ashi. Oset rongnung merang oset, yin oset ya kangasa temerang, asen tashi agi raksadi ta ser martol (Hammer) agi akosatsü merang-aka, aser merang arangba oset (Hacksaw Plate) agi rangsatsü merang-aka, küm tepiyong nung asenoki aikabo meraksatettsü. Ajisuaka, merang achiba tarütsü ka lir, asenoki iba dangji ‘SONG’ (Rust) ta ajar. Iba song yagibo merangji kechi koma’ar ka merangyong-jia repranga lia ita ishika tsüngda nung chimar. Surabangla, idagi Yisu-i shinuba rongsen chirepba song-ji kechi dang ajar asütsü …??? Tanü asen putu nung rongsen chireptsüba aser rosepdaktsüba ‘TARÜTSÜ’ aser ‘SONG’-ji Drugs, Yi, Lottery, Sen sayi-ba tapu-tapu etc. item ya asütsü.
Ano item ajak dak alaka, tanü asen putu nung rongsen chireptsüba tarütsü aser song tamajungtiba ka lir, aser aji tanga kecha masü, saka ‘ELECTION’ song ya ka asütsü. Election yagi rongsen ya küm pungo tsüngda nung lakh-sa lakh, Crore-sa Crore chireptsür. Ano iba dak alaka, rongsen shirnoki tim lenmang nung ketdangsüa mamshir, item rongsenji amajok nung, angati nung chimar, asentsü sena meranga belemseta meinyaker, tangar nisung kar-ang jonglongdaktsür, mesura Hospital nung mozü-mora nungang ajunga intoker. Sayutsüngir ken zülur-i ashi, ” Ne chiyungtsüji tzüma nung prokang, kechiaser nai anogo aika lir aji angutsü” (Sayu-11:1). Yisu-i Kodak nung rongsen rizüngang ta ashibaji iba-ia ka asütsü sudi ta bilemer. Tzüma nung chiyungtsü paloktsü nung kodaser tanaben meyipa bena arutettsü …??? Saka sayutsüngir-i ashibaji anogo aika lir nai aji angutsü. Tetezü, asenoki asen nem kodanga meyipa magutsütettsüba meshi-mejunger, mekokmeiner, sensaker, lajar, timtemer nem angadi agüja tajung inyakra, ibaji kotak nung rongsen rizüngbaji asütsü sudi.
Timtemer tang temeim mapa inyakba aser nungdakba-purtem den lemsatepba, item mapa tajungtem yabo tarütsü aser song agi machitsü aser aouer-ia rakpoka maouyatettsü. “Aser shibai item tilatem rongnung ka nem tzü-zü marok ka danga nutsüng tenung nung tajemtsü agutsüdir, pai koda-kang pei tajangzük mesamatsü” (Mathi-10:42). Shirnoki Tsüngrem-er osangtajung abener, sayutsüngirtem, Tsüngrem tenzükertem dang mapa tajung inyaker, oda tzü-zü marok ka danga agutsür, parnok jagi koda-kang pei tajangzük mongui malitsü ta laishiba jagi ashir. Tsüngrem lartem aser sensaker mekokmeinertem dang ajungba aser yaribaji amajok masü, Yisu-i kotak nung rongsen rizüngtsüba ashiba rongnung iba-jia ka asütsü sudi. Tanabuba nung Tsüngremi asen nem moatsüba nungi pa shilem ter nung ka ‘TERSHILEM’ shidak agutsüba, tepela, temoatsü aser tenungsang tenla agutsüba item ajungaji kotak nung rongsen rizüngba rongnung ka asütsü sudi.
Ano asenok alima nung alidang, tarutsü aser song kecha agia achitsü makokba, ashi-aouer-ia aouyatsü makokba tesem nung rongsen rizüngtsü tajungtiba kaji, asen jabaso-jala nem kaket shisatsü shisaliok ‘Degree’ tulu ngua züngdaktsüba iba ya-a ka asütsü. Degree tulu ngua züngdaktsüba yabo pa/la tasü-nu leper nung dang rema yutsütsü, iba dakji alaka tenükmerem agia memeremzüktettsü, ashi-kulak agia magizüktettsü, aouer-ia maouyatettsü aser rakzükraktemer-ia merakzüktettsü. Alu-kimong, ki-o-jen,  gari, sen, senti-rongsen item ajungaji rakzüktsü akok, auyatsü akok, mi agi rongdoktsü akok aser tzümetsüng agi okshia bener aotsü akok.  Takartem aikati pei chirnur nem ali-kimong aika alia toktsür, RCC ki tulu atongtepa yanglua yutsür, Bank nung sen lakh-lakh, Crore-Crore rizünga yutsür. Ajisuaka kanga tia maka, kangasa temeimtsüka,  aser kangasa tesasatsüka, karbo par jabaso-jalatemi Drugs achiba agi, yi ajemba agi, sen sayiba agi aser sentsüh yong ajungaji lilemdaktsüba, mesura malang-machi agi yoktoker tazüngla akümba aika tenük agi ngua ajangshia aruogo. Ajisuaka, tsürabur shirnoki shisa ka-a pei jabaso-jala nem kaket shisatsü shisaliok Degree tulu ngua züngdaktsür, iba Degree-jibo shinga-ia nükmerem agia memeremzüktsü, tashiyim agia rakzüktsü makoktsü aser aouer-ia aouyatsü makoktsü. Atangji, alima nungbo senmang rongnung ajak dang tulutiba aser tajungtiba-ji aji ka asütsü sudi. Takartem shirnoki Tsüngremi ne nem rongsen moatsüba-ji na/ner atema dang ta mebilemi nubur den lemsateper, mapa tajung inyaker, angati temeim sayur, Tsüngremi tali-tali dang moatsütsü. Saka shirnoki kurua rizüngdena ayur, shibai metet tesulen amajok lenmang kar nung-ang indoktsüsa Tsüngremi lenmang lapoktsütsü. Temeim takar-tem, Tsüngremi ne nem moatsüba rongsen-ji ashiko, tetibo ne ket nung malitsü, ashiko mapang ka nungbo, tanü sensakpo jenjang nung alirtem kar keti dang, oda meimlaba nisung kar keti dang aotsü-a akok, saka ne ket nung alidang tarutsü aser song agi achitsü makokba lenmang nung amshitsüla. Ajak dak alaka, Tsüngremi asen nem moatsüba rongsen-ji alima yangertsüba, alima renloktsüba, yimten, arogo, lokti ajangzüktsüba, nubur telongjem adokdaktsüba, ibala mapa nung amshidi. Atangji, tenung tajung, mapa tajung, nubur asoshi tajangzük, temoatsü agutsüba, alima mesama tashi senmang amangtepyonga aotsüba “NUNGO” mapa inyakba nung amshidi, surabang tarutsü aser song agi machitsü.